Уус-Алдан улууһун Стрекаловский М.М аатынан Өнөр орто оскуолатын ахсыс кылааһын үөрэнээччитэ Лукачевский Артем кыра сааһыттан науканан дьарыктанан саҕалаабыт. Научнай-практическай кэмпириэнсийэлэргэ дакылаат ааҕар уонна олимпиадаларга кыттар эбит. Кэнники кэмҥэ Артем медицинаны ордук сэҥээрбит.
Уус-Алдан улууһун Өнөр оскуолатыгар науканан дьарыктанар оҕолортон биирдэстэрэ — Артем Лукачевскай. Кини республиканскай «Инникигэ хардыы» күрэххэ медицина хайысхатыгар иккис степеннээх дипломант буолбут, салайааччыта Лена Серафимовна Колесова.
— «Большие Вызовы » күрэххэ сүбэ быһыытынан ыҥырыллыбыппыт. Балаһыанньатын олус диэн сөбүлээтибит вебинарга сылдьан элбэҕи биллибит. Маннык бырайыактар оҕолорго наһаа наадалаахтар туһалаахтар дии саныыбын. Билигин бастакы түһүмэххэ бэлэмнэнэн үлэбитин өссө көрөн, бэрийэн, эбэн биэрэ сылдьабыт. Үлэбит таблеточнай батареяны оҕо ыйыһыннаҕына туохха тиэрдиэн сөбүн, сөптөөх эмтиир ньымалары буларга чинчийии ыытабыт. Билинни олох ирдэбилинэн оонньуур барыта уоттаах-күөстээх, үксэ батареянан үлэлиир кэмигэр тоҕоостоох тема дии саныыбыт. «Большие Вызовы» күрэх кыттыылаахтарыгар баҕарыам этэ үчүгэй бэлэмнэниини, үрдүккэ талаһыыны, күүстээх санааны, тобуллуҕас өйү, — диир Артем Лукачевскай.