Сороҕор киһи күннээҕи олоҕор кыра да кыһалҕа таҕыстаҕына, кыыһыран өс-хаан буолар, кыраттан даҕаны санаата түһэр, алдьанар түгэннэрдээх буолар…
Мин кинини алҕас социальнай ситимҥэ түбэһэ көрбүтүм. Олоххо дьулуурдаах, сытыы-хотуу эдэр киһи суруйуулара, хаартыскалара, видеороликтара тутатына болҕомтобун ылбыттара уонна хайдах эрэ киһи санаатын көтөҕөр, нууччалыы «мотивациялыыр», кынаттыыр курдук буолбуттара. Уонна саамай сүрүнэ — кини, аҕа киһи быһыытынан, кыыс оҕотун соҕотоҕун иитэрин, көрөрүн-истэрин биһирээбитим уонна хайгыы көрбүтүм.
Кини аата Арсений Винокуров. Хомойуох иһин, төрүүрүгэр эчэйии ылан, ДЦП диагнозтаах. Онон инбэлиит кэлээскэнэн, ходунок көмөтүнэн хаамар. Ол да буоллар кини онтон тутулуктанан, самнан турбат. Арсений ыал улахан оҕото, 1995 сыллаах төрүөх. Оҕо сааһа үксэ балыыһаҕа ааспыта. Ол да буоллар, Дьокуускай куорат 35 нүөмэрдээх оскуолатын үөрэнэн бүтэрбитэ. Оскуола кэнниттэн куораттааҕы доруобуйаларынан хааччахтаах дьону үөрэтэр лицейы бүтэрэн, “ЭВМ оператора” диэн идэни баһылаабыта. Олоххо дьулуура, тардыһыыта, атын сири билиэх-көрүөх санаата баһыйан, аны салгыы Рязанскай уобаласка Михайлов диэн куоракка бухгалтер-экономист идэтигэр үөрэнэ киирбитэ. Икки сыл отой билбэт куоратыгар үөрэммитэ. Бу үөрэнэр кэмигэр кини адаптивнай спорт көрүҥүнэн, сүрүннээн — боччанан дьаныһан туран дьарыктаммыта. Элбэх күрэхтэһиилэргэ ситиһиилээхтик кыттыбыта, бу сылдьан Арсений спорт маастарыгар тиийэ үүммүтэ. Дьаныардаах уолу тренерэ бэлиэтии көрөн, бочча көрүҥҥэ устудьуоннары эрчийэригэр көрдөспүтэ. Онон кини аны үлэлии-үлэлии үөрэммитэ. Ол гынан баран, дьиэҕэ үөрэммит уолу бүтэһик кууруска педагогическэй сэбиэт үөрэҕиттэн тохтоппута. Бу да буоллар, эдэр киһи мантан толлубакка, салгыы Волгоградскай уобаласка Калачевскайдааҕы техникумҥа иккистээн үөрэххэ киирэр уонна бүтэрэр.
2013 сыллаахха сүрэҕин чопчута — кыракый кыысчаана Ариша күн сирин көрөр. Хомойуох иһин, Арсений кыыс ийэтин кытары табыллыбаккалар, арахсарга күһэллибиттэрэ. Билигин 8 саастаах Ариша аҕатын, эбэтин, эдьиийин кытары олорор, Дьокуускай куорат классическай гимназиятыгар 2 кылааска үөрэнэр.
Аҕалаах кыыс иллэҥ кэмнэрин өрүү бииргэ атаараллар. Саамай сөбүлээн араас вайннары, көрдөөх видеороликтары усталлар. Ариша аҕатын бастыҥ сүбэһитэ, көмөлөһөөччүтэ.
Мин Арсенийтан ыра санаа туһунан ыйытабын, кини онно маннык диэн хардарар:
— Мин саамай улахан ыра санаам — аан дойдуну көрүү, араас дойду олохтоохторун, кинилэр култуураларын, историяларын кытары билсиһии, оҕобор, Аришабар, көрдөрүү буолар.
Мин хаһан даҕаны бэйэбин кыаммаппын, маны сатаабаппын, маны кыайбаппын диэн саҥарымматаҕым, ытамматаҕым, төрөппүттэрим даҕаны оннук иитэн таһаарбыттара. Онон ыччакка этиэм этэ, киһиэхэ олох биирдэ бэриллэр, онон үлэлээн-хамсааҥ, олох – кэрэ, олох – үтүө эрэ диэн тылларынан салайтаран олоруҥ. Хаһан даҕаны миэхэ бу сатаммат, миэхэ бу кыаллыбат диэн этимэҥ, киһи ылыстаҕына барыта табыллар.
Арсений Инстаграм социальнай ситимҥэ @kaban_bro_ykt диэн никтаах. Тоҕо чуолаан бу ааты ылыммыт төрүөтэ маннык эбит, “кабан” — төрөөбүт сылыгар дьүөрэлээн дьоно ардыгар кинини (күүстээх санаалаах диэнинэн салайтаран) “кабан” диэн ааттыыллар эбит, оттон “бро” диэн доҕотторо ыҥыраллар эбит.
Билигин кини 4200 тахса сурутааччылаах, 5000-ҕа диэри сурутааччы хомуйар сыаллаах. Онон күндү доҕоттор, күүстээх санаалаах блогер уолу өйүөҕүҥ, инникитин айар үлэтигэр толору кыаҕы биэриэҕиҥ!
Суруйда Анна СЛЕПЦОВА.