Норуоттар икки ардыларынааҕы «Россия — биһиги» култуура уонна үөрэх бырайыагын чэрчитинэн ыытыллар «Арктика талааннара. Оҕолор» диэн смена Калужскай уобаласка «Этномир» этнографическай парк-музейга буолан ааста.
Бу бырайыак иһинэн оҕолор Арассыыйа аҕыйах ахсааннаах норуоттарын култуураларын, тылларын-өстөрүн, үгэстэрин биллилэр-көрүллэр, үөрэттилэр, элбэх интэриэһинэй дьону кытары билистилэр-алтыстылар, атын эригийиэн оҕолорун кытары доҕордостулар. Уопсайа умнуллубат бэртээхэй 10 күннээх үөрэх уонна култуура эйгэтин бииргэ түмэр сменаҕа дуоһуйа сынньаннылар.
Саха сириттэн дойдубут аҕыйах ахсааннаах норуоттарын тылларын-өстөрүн, култуураларын, үгэстэрин харыстыыр, кэнчээри ыччакка тиэрдэр сыаллаах бырайыакка Арктика улуустарыттан биэс оҕо кыттыыны ылла: Усуйаанаттан Уйгуяна Горохова, Кэбээйи улууһуттан Максим Кейметинов уонна Аниврин Алексеев, Алдан улууһуттан Ганна Степанова, Анаабыртан Айаана Туприна.
Оҕолор бөлөхтөрүн А.Е.Кулаковскай аатынан Норуоттар доҕордоһууларын дьиэтин сүрүннүүр үлэһитэ Анастасия Куличкина салайан илдьэ сырытта.
Биһиги оҕолорбут бэйэлэрин төрөөбүт тылларын араас айымньы жанрыгар толордулар, Сахабыт сиригэр олорор аҕыйах ахсааннаах норуоттар култуураларын, үгэстэрин, сиэрдэрин-туомнарын көрдөрдүлэр, киэҥ эйгэҕэ билиһиннэрдилэр.
Маны таһынан оҕолор Москва куоракка ыытыллыбыт XVI «Сокровища Севера» аан дойдутааҕы быыстапка-дьаарбаҥкаҕа кыттыыны ыллылар.
Тэрээһин үөрүүлээх арыллыытыгар Айаана Туприна «Дулганнар кыыстара» диэн көрдөөх ырыаны толордо. Онтон «Кочевье Севера» фестивальга Айаана Туприна «Дулгааннар кыыстара» ырыатын, Уйгуяна Горохова «Лохогайнули» юкагирдыы үҥкүүнү, Ганна Степанова Дэвэлчэн бухатыыр туһунан эбэҥки нимнгаканы (олоҥхону), Аниврин Алексеев Петр Кейметинов «Аяврам» диэн эбээннии ырыатын толордулар, көрөөччү биһирэбилин ыллылар.
Оҕолор бүгүн Дьокуускай куоракка көтөн кэллилэр.
Анна СЛЕПЦОВА.