Бүгүн «Энергетик» лааҕырга Саха өрөспүүбүлүкэтин Национальнай архыыбын дириэктэрин солбуйааччыта Наталия Степановна Степанова ыалдьыттаата. Биһигини кытта көрсөн, архыып туһунан кэпсээн, сырдатан барда.
Биһиги төрүттэрбит туһунан араас кэмнэргэ суруллубут былыргы докумуоннар барыта архыыпка ууруллан, хараллан сыталлар эбит. Маннык харайан уураллара дьоҥҥо наһаа туһалаах. Холобур, төрүттэрбит ханна олорбуттарын, хас сыллаахха төрөөбүттэрин, сэриигэ хаһан, хантан барбыттарын туһунан архыыптан булан ылан, чинчийэр үлэбитигэр туһаныахпытын сөп.
Наталия Степановна Национальнай архыып саайтыгар киирэн, хайдах регистрацияланары кэпсээтэ. Бастаан Национальнай архыып саайтыгар https://archivesakha.ru киирэбит. Киирэн баран, «АИС ЭЛАР» диэни баттыыбыт https://archivesakha.ru/ais-elar/ Онно видеоинструкцияны көрөн, үөрэнэбит уонна дьэ регистрацияланабыт. Дьэ уонна электроннай архыыбынан туһанан барабыт. Төрүччүбүтүн үөрэтэрбитигэр ханнык докумуоҥҥа, туох информацияҕа наадыйарбытын хайаан да билиэхтээхпит. Оччоҕо электроннай докумуоннары буларга түргэн уонна чэпчэки. Өссө дьиэҕиттэн төлөпүөҥҥэр олорон барытын булуоххун сөп.
Научнай-практическай конференцияҕа дакылаат суруйарга наһаа наадалаах, туһалаах эбит.
Сардаана СТРУЧКОВА, IX кылаас,
Е.А. Шишигин аатынан Сатаҕай орто оскуолата, Амма