Ахсынньы 19 күнүгэр Арассыыйа Президенэ Владимир Владимирович Путин 2025 сыл түмүгүнэн быһа эфиргэ тахсан, сурунаалыстар, Арассыыйа олохтоохторун ыйытыыларыгар хоруйдаата. Мин эмиэ Арассыыйа олохтооҕо буоламмын быһа эфиры толору көрдүм. 4 чаас 28 мүнүүтэ устата буолла. Эппиттэрин курдук, Президеҥҥэ 3 мөл. тахса ыйытыы киирбит. Онтон быһа эфиргэ Владимир Владимирович 103 ыйытыыга хоруйдаата.
Барыбытын долгутар сүрүн ыйытыы билигин буола турар анал байыннай дьайыылар туһунан буолла.
– Сэрии эбэтэр эйэ? Биһиги бу сэриини түмүктүөхпүтүн баҕарабыт, – диэн В.В. Путин эппитин үөрэ иһиттим.
Түөкүттэр дьону албыннаан мөлүйүөнүнэн сууммаҕа иэскэ баайалларын туһунан ыйытыыны сэргээтим.
– Түөкүттэр дьону албынныыр араас ньымаларын өссө сайыннаран иһиэхтэрэ. Билбэт нүөмэргит эрийдэҕинэ, төлөпүөҥҥүтүн арааран кэбиһиҥ, – диэн сүбэлээтэ дойду баһылыга.
13 саастаах юнкор Максим Захаров Владимир Владимирович Москва устун массыынанан биллибэккэ-көстүбэккэ айанныы сылдьан информацияны хайдах ылынарын туһунан ыйытта.
– Итинник биирдэ эмит буолааччы. Сороҕор ДПС арыаллааһына суох сылдьааччыбын. Ити наадата суох айан буолбатах. Мин маннык сылдьаммын Москваны атын өттүттэн көрөбүн, – диэн хоруйдаата.
Саха сириттэн Владимир Путины кытта көрсүһүүгэ икки суруналыыс ыйытыы биэрдэ. Владимир Владимирович саха норуотун хайҕаата. Дьиэ кэргэни өйүүр, көмөлөһөр миэрэлэр туһунан ыйытыыларга Владимир Владимирович 2026 сыл тохсунньу 1 күнүттэн дьиэ кэргэни өйүүргэ саҥа дьаһаллар баар буолалларын туһунан эттэ.
– Былаас дьон дохуота намтаабатын, дьиэ кэргэни өйүүр дьаһаллар оҥоһуллалларын туһугар дьулуһуоҕа, – диэн эттэ В.В. Путин.
Түөрт чаас устата буолбут быһа эфиры көрө олорон туох түмүккэ кэллим? Анал байыаннай дьайыылары тохторго арҕааҥҥы дойдулары кытта улахан үлэ ыытыллар, уһуга көстөөрү гыммыт диэн үөрдүм. Владимир Владимирович ыйытыыларга түөрт чаас устата ис сүрэҕиттэн кыһаллан туран хоруйдаата. Дойдубут күүстээх, бэриниилээх дьоннорунан сайдыан баҕарар. Бары биир хамаанда буолан үлэлээтэхпитинэ, дойдубутун тупсарар кыахтаахпыт. Быһа эфиры көрөн, баһаамы эбинним. Арассыыйа сайдыытыгар мин тус бэйэм тугунан көмө буолуохтаахпын туһунан толкуйга түстүм.
Виталий ОРЛОВ, IX кылаас,
С.Д. Флегонтов аатынан Хадаар орто оскуолата, Чурапчы