Аҕа дойду Улуу сэриитигэр Уус Алдан Баатаҕайыттан 142 киһи ыҥырыллан барбыт. Онтон 69 киһи геройдуу охтубут, 9 киhи сураҕа суох сүппүттэр. 73 эрэ киһи тыыннаах эргиллэн кэлбит. Олор истэригэр мин хос эhэм Савва Тимофеевич Алексеев баара.
Сэрии, үлэ ветерана, Сэбиэскэй сойуус коммунистическай партиятын чилиэнэ, өрөспүүбүлүкэ, оройуон уус-уран көрүүтүн хас да төгүллээх лауреата, айылҕаттан бэриллибит талааннаах ырыаһыт Савва Тимофеевич Алексеев 1913 сыллаахха Уус Алдан оройуонун Дүпсүн улууһун Тэбиик нэһилиэгин Дабаадыма учаастагар төрөөбүтэ.
1942 сыллаахха сайын от үлэтин кэмигэр оттуу сылдьан Савва Тимофеевич Аҕа дойдутун фашистскай Германияттан көмүскүү барарга бэбиэскэ туппута. Хос эhэм уоттаах сэриигэ арҕаа фроҥҥа кыттыбыта, Смоленскай фроҥҥа, Орловскай уобаласка өстөөҕү кытта хас да күннээх түүн улахан хаан тохтуулаах кыргыһыыга улаханнык бааһырбыта. Байыаннай госпитальга киирэн эмтэнэн баран, доруобуйатын туругунан 1943 сыллаахха саппааска таһаарыллыбыта, Уһук Илин уокурукка Владивосток куоракка тыылга таас чох хостооһунугар шахтаҕа үлэҕэ ыытыллыбыта. Ити сыл бүтүүтэ дойдутугар кэлбитэ. Кэлээт да, Жданов аатынан холкуоска хонуу биригэдьииринэн, сылгы ферматын сэбиэдиссэйинэн үлэлээбитэ. Сир оҥоһуутугар – мас, тутуу үлэтигэр, тимир ууһунан – техника өрөмүөнүгэр сылдьыбыта.
Хос эhэм 1933 сылтан 19 сааһыттан нэһилиэгин кулуубуттан норуот сөбүлээн ыллыыр ырыаларыттан саҕалаан биһиги кэккэбититтэн туоруор диэри уус-уран көрүү активнай кыттыылааҕа этэ. Кини олоҥхону таһынан П.А. Ойуунускай «Кыһыл ойуунун», Илья Находкин «Наара суох», Суорун Омоллоон «Күөх Көппөтүн» сүрүн оруолларын ситиһиилээхтик толортоон көрөөччүлэри үгүстүк кэрэхсэппитэ. Хос эhэм хас да ырыалара өрөспүүбүлүкэтээҕи радиокомитет фондатыгар уһуллан сыталлар.
Хос эhэм Савва Тимофеевич мин эhэбин Семен Федоровиhи кыра сааhыттан бэйэтин талааныгар элбэххэ үөрэппитэ. Эhэм Семен Федорович култуура туйгуна буоларыгар хос эhэм Савва улахан төһүү күүс буолбута.
Айсаана ГОТОВЦЕВА, III кылаас,
Модут орто оскуолата, Нам