Быйыл Ньурба улууһугар спорт сылынан биллэриллибитэ. Онон Спорт сылын көрсө Октябрьскай нэһилиэк олохтоохторугар уонна ыччаттарыгар анаан Антоновка сынньалаҥ пааркатыгар саҥа каток үөрүүлээхтик арылынна.
Бу үтүө дьыаланы олоххо киллэрэргэ элбэх киһи уонна тэрилтэ күүс-көмө буоллулар. Бырайыак сүрүн көҕүлээччитинэн Бөгдьөөлө түөлбэ олохтооҕо, спорт кыһыҥҥы көрүҥнэригэр тренер, улуус депутата Петр Осипов буолла. Кини көҕүлээһинин Октябрьскай нэһилиэк дьаһалтата, БОН (Бэйэ оҥостуута) уонна олохтоох кулууп үлэһиттэрэ өйөөн, биир сомоҕо буолан үлэлээтилэр.
Каток кээмэйэ 15х20 м. Мууһун тоҥорорго уопсайа 4000 литр уу кутулунна — ол аата 20 массыына уу баранан, киэҥ былаһаакка бэлэм буолла. Бу үлэҕэ дьаһалта водовоһа Андрей Гаврильев, чааһынай тэрилтэлэртэн Владимир Семенов, Виталий Алексеев, «Вольт» маҕаһыын, «Нюрба-Агро» МТС уонна «Пегас» автооскуола спонсор быһыытынан көхтөөхтүк кыттыыны ыллылар. Барҕа махтал буолуохтун.
Каток арыллыытыгар этиллибитин курдук, маннык былаһаакка оҕолор уонна ыччаттар сибиэһэй салгыҥҥа сылдьан чөл туруктаах буолалларыгар, доруобуйаларын тупсаралларыгар улахан суолталаах. Инникитин өссө кэрэхсэбиллээх былааннар бааллар — ол курдук, хаатыҥкалаах хоккей (хоккей в валенках) күрэхтэрин тэрийии былааннанар.
Каток үлэтин иһитиннэриитэ:
- Үлэлиир күннэрэ: субуота уонна өрөбүл.
- Кэмэ: 14:00 чаастан 18:00 чааска дылы.
- Хаҥкы арендата: 30 мүнүтэ — 150 солкуобай.
- Размердара: 30-тан 46-ҕа дылы бааллар.
- Уратыта: Бэйэ хаҥкылаах кэлэр буоллаххытына — кирии босхо!
- Сэрэтии: Халлаан сылыйдаҕына үлэлиир графига уларыйыан сөп.
Биһиги оҕолор, өрөбүллэрбиттигэр, сааскы сынньалаҥмытыгар үөрэ-көтө хаҥкылыахпыт, ооньуохпут. Кэлиҥ, сылдьыҥ, чөл олоҕу өрө тутуҥ! Антоновка паарката эһигини күүтэр!
Потапова Юлия 11 «б» кылаас, Н.Н.Чусовской Антоновка орто оскуолата, Ньурба