Антон Иванов – “Снежный барс” XXV өрөспүүбүлүкэтээҕи байыаннай-спортивнай оонньуулар кыайыылааҕа “Факел” хамаанда хамандыыра, Х кылаас үөрэнээччитэ.
Антон кэпсииринэн, “Факеллар” “Снежный барска” бу бастакы кыттыылара. Хамаанда састаабыгар Алаҕар, Мурун, интэринээт-оскуола IX, X, XI кылаас үөрэнээччилэрэ бааллар.
– Бары бэйэ-бэйэбитин эрдэттэн билсэбит. Россияҕа Саха сирин чиэһин көмүскүү барар буолбуппут улахан эппиэтинэс. Күүстээх дьарык, үлэ күүтэр, – диэн этэр.
Мин “Факел” хамандыырыттан хос эһээтин туһунан кэпсииригэр көрдөстүм.
– Хос эһээм Радомир Николаевич Яковлев Аҕа дойду Улуу сэриитин кыттыылааҕа. “Снежный барска” кытта сылдьарым тухары эһээм иннигэр, кини хорсун олоҕор сүгүрүйэр, махтанар санаа миэхэ элбэхтик охсуллан ааста уонна кыайыыга сирдээтэ дии саныыбын. Хос эһээм дуобакка спорт маастара этэ. Сэрииттэн икки хараҕа көрбөт буолан кэлбит. Оннук көрбөт киһи дуобакка спорт маастарын нуорматын толорбут. Хос эһээм спорду этинэн-хаанынан ылынар буолан итинник улаханы ситиспитэ буолуо дии саныыбын. Миэхэ спортка дьулуһуу баарыттан үөрэбин, – диэн Антон хос эһээтин Радомир Николаевич Яковлев туһунан бэрт интэриэһинэйи кэпсээтэ.
Алена КСЕНОФОНТОВА, VII кылаас,
С.Д. Флегонтов аатынан Хадаар орто оскуолата, Чурапчы