Үҥкүү алыптаах эйгэтэ хас да үйэ тухары сүппэт, өлбөөдүйбэт. Киһи үҥкүүлээн кэрэҕэ, сырдыкка тардыһар, иэйиитэ уһуктар, санаата сааһыланар. Оттон хас биирдии хамсаныы бэйэтэ туспа олохтоох уонна остуоруйалаах буолар.
Олунньу 27 күнүгэр Саха тыйаатарын сыанатыгар Арктикатааҕы ускуустуба уонна култуура судаарыстыбаннай института ускуустуба үөрэҕириитин научнай, педагогическай уонна айар үлэ доктора, хореография бэрэпиэссэрэ, Арассыыйа ускуустубатын үтүөлээх үлэһитэ, Хоту дойду уонна Арктика норуоттарын этническэй үҥкүүлэрин чинчийээччи Ангелина Григорьевна Лукина 50 саастаах үбүлүөйүгэр аналлаах дьоро киэһэ тэрийэн ыытта. Бу күн кини салайыытынан үлэлээбит-хамсаабыт, дьарыктаммыт 20 тахса өрөспүүбүлүкэ араас ансаамбыллара кыттыыны ыллылар. Ол курдук, «Аар-аартык», «Саарын», «Уран», «Өркөн», «Долун», «Тетрис», «Сюрприз» үҥкүү ансаамбыллара, ону таһынан АУуКСИ устудьуоннара. Тэрээһин алгыстан, бэрэпиэссэр кинигэлэрин быыстапкатыттан, Институт устудьуоннарын арт-маркетыттан саҕаланна.
Бэрэпиэссэр Ангелина Григорьевна Лукина — Хоту дойду, Сибиир уонна Уһук Илин норуоттар этнохореографияларын чинчийээччи, аҕыйах ахсааннаах норуоттар төрүт үҥкүүлэрин үөрэппит, суруйбут Арассыыйа учуонайа, хас да монография ааптара. Кини — АУуКСИ бэрэпиэссэрэ, институкка саха үҥкүүтүн оскуолатын төрүттээччилэриттэн биирдэстэрэ. Ангелина Григорьевна саха этнохореографиятын харыстаабыт уонна сайыннарбыт сүҥкэн кылааттаах, үтүөлээх киһи буолар.
Бу 50 сыл тухары Ангелина Лукина талааннаах илиилэриттэн тыһыынчаттан тахса үҥкүү идэтин баһылаабыт үлэһиттэр, культурологтар, үҥкүү ортоку уонна үрдүкү таһымнаах учууталлара үүнэн-сайдан тахсыбыттара. Кини салалтатынан элбэх үҥкүү туруоруллубута, ансаамбыл айыллыбыта.
АУуКСИ ректора Саргылаана Игнатьева маннык эттэ:
Ангелина Григорьевна Лукина салалтатынан норуот уус-уран култууратыгар аҕыйах ахсааннаах норуоттары үөрэтии ареала олус кэҥээтэ. Кини төрүттээбит «Аар-аартык» народнай ансаамбыла АУуКСИ визитнэй хаартачката буолар. Ансаамбыл туруоруулара аан дойдуну баһылаабыттара, оттон ансаамбылтан кынаттанан тахсыбыт оҕолор бэйэлэрэ ансаамбыл тэрийбиттэрэ, саха сиригэр уонна да атын дойдуларга үҥкүү эйгэтин сайыннарбыттара, тарҕаппыттара, оҕолору үтүөҕэ-кэрэҕэ уһуйбуттара. Учууталбыт киллэрбит кылаата сүҥкэн уонна инникитин да сайдар суоллаах.
Норуот муудараһа, күүһэ, баайа уонна өйө-санаата кини илдьэ сылдьар уус-уран култууратыгар, айымньытыгар, таһаарыылаах үлэтигэр көстөр. Үҥкүү үөрэҕэ уонна эйгэтэ — олортон биир сорҕото уонна сүдү көрүҥэ буолар.