Байаҕантай нэһилиэгэр Улуу Кыайыы 80 сылын көрсө 80 Албан аат күннэрин чэрчитинэн, кулун тутар 24 күнүгэр «Биһиги дьиэ кэргэн Өйдөбүнньүгэ» бырайыак былааннаах тэрээһинэ буолла.
Ол курдук, Өйдөбүнньүк бу күнүгэр биир дойдулаахтарбыт, урукку Тандыыныскай нэһилиэктэн төрүттээх Аҕа дойду Улуу сэриитин хорсун буойуннара Андросовтар бойобуой суолларын, сэрии хонуутугар геройдуу охсуһууларын туһунан биллибит.
Күндү ыалдьыттарбытынан педагогическай үлэ бэтэрээнэ, РСФСР, Саха Өрөспүүбүлүкэтин үөрэҕириитин туйгуна, Мүрү нэһилиэгин бочуоттаах олохтооҕо Людмила Афанасьевна Андросова, педагогическай үлэ бэтэрээнэ, РФ уопсай үөрэхтээһинин Бочуоттаах үлэһитэ, Саха Өрөспүүбүлүкэтин үөрэҕириитин туйгуна, Үөһээ Бүлүү гимназиятын учуутала Любовь Андреевна Андросова-Бойлохова, Андросовтар аймах сиэн уоллара Гаврил Валерьевич Попов буоллулар.
Өйдөбүнньүк күн Кыайыы болуоссатыгар Г.В. Егоров, В.Д. Лонгинов пааматынньыктарыгар сибэкки дьөрбөтүн уурдулар. Ол кэнниттэн И.П. Готовцев аатынан историко-краеведческай музейга ахтыы киэһэтэ буолла. Андросовтар дьиэ кэргэн Улуу Кыайыы 80 сылыгар аналлаах оскуола оҕолоругар уруһуй күрэҕин ыыттылар уонна кыайыылаахтары наҕараадалаатылар. Алын кылаастарга Айтал Сидоров (1 кылаас), Ева Никифорова (2 кылаас), Саргылаана Булдакова (3 кылаас), орто сүһүөхтэргэ Алексей Ларионов (6 кылаас), Дьулуур Неустроев (6 кылаас), Ариана Абрамова (6 кылаас) бириистээх миэстэлэргэ тигистилэр.
Танда олохтоохторугар, оҕолорго сэрии тиэмэтигэр аналлаах викторина ыыттылар. Биирдии киһиэхэ сэмэй бэлэх туттардылар.
Бу ыытыллыбыт Өйдөбүнньүк күн бары үчүгэй баҕайытык олорон кэпсэттибит уонна ырыа ыллаатыбыт.
Күндүүнэ ЕГОРОВА, VII кылааас,
М.Н. Готовцев аатынан Танда орто оскуолата, Уус Алдан
Ааптар хаартыскалара