Алтынньы 17 күнүгэр, нэһилиэкпит баһылыгар – Михаил Артемьевка ыалдьыттаатыбыт, аҕыйах ыйытыыларбытын биэрдибит. Көрсүһүү кэмигэр биһиги нэһилиэкпит олоҕун, сайдыытын уонна инникитин туһунан аҕыйах ыйытыылары биэрдибит. Кинини кытта Лилиана Яковлева сэһэргэстэ.
Бастатан туран, билигин хас биирдии олохтооҕу долгутар кыстыкка бэлэмнэнии ыйытыыта турда. Нэһилиэк кырыа кыһыҥҥа хайдах бэлэмнэнэ сылдьарын Михаил Артемьев чопчутук сырдатта. Нэһилиэккэ ыытылла турар үлэлэри, ол иһигэр сылааһынан хааччыйыы туһунан кэпсээтэ. «Кыстыкка бэлэмнэнии үчүгэй» диэн долгуйууну уҕарытта. Ону таһынан, быйылгы сылга оттооһун былаана барыта толоруллубутун эттэ.
Кэлэр ыйытыы нэһилиэк дьонун ахсаанын үүнүүтүгэр, уларыйыытыгар ананна. Нэһилиэккэ кэлии-барыы элбэх буолан дьон ахсаана халбаҥныы турарынан сиэттэрэн, Амма нэһилиэгэр урукку кэми кытта тэҥнээн көрдөххө дьон ахсаана аҕыйаата диэн этэр. Суругунан, ол эбэтэр официальнай ааҕыынан олохтоохтор ахсааннара 6426 киһи. Ол эрээри суругунан уонна олорорунан киһи ахсаана эмиэ атын-атын буолар. Перепиһинэн аахпакка олорор дьон ахсаана 7000-ттан тахса эбит.
Дьаһалта иһинээҕи үлэттэн баһылыкпыт бу курдук сырдатта:
Штатпыт иһигэр 10 муниципальнай сулууспа баар. Маны таһынан централизованнай бухгалтерия баар. Бары бэйэлэрин хайысхаларынан үлэлии-хамныы сылдьаллар. Аммабыт нэһилиэгин иһигэр 14 түөлбэлээхпит. Ол түөлбэлэргэ барыларыгар салайааччылаахтар. Онон кинилэр баар буоланнар, уопсай үлэни чэпчэтэллэр диэтэхпинэ алҕаһаабаппын
Нэһилиэк кэнэҕэскитин сайдарыгар биир сүрүн ыйытыытынан буолар: эдэр ыал олохсуйуута. Элбэх ыал куоракка тардыһар эбит буоллаҕына, сорох ыал дойдуларыгар, тыаларыгар төҥнөн кэлиилэрэ эмиэ баар.
Аммабыт нэһилиэгэр эдэр ыаллар кэлиилэрэ элбээтэ. Кэлээт саҥа дьиэни туттан олохсуйаллар, Аммабыт кэҥээн иһэр
Сыл аайы ортототунан 20 саҥа дьиэ тутуллан эбиллэ турар. Үксүн бары улуус киинигэр талаһаллар. Иннэ гынан сир боппуруоһа Амма нэһилиэгэр күүскэ турар. Элбэх оҕолоох ыаллар таһынан анал байыаннай дьайыыга сылдьар биир дойдулаахтарбытыгар, уолаттарбытыгар сир бэриллиэхтээх. «Муона» алааһыгар билигин 224 учаастак бэлэмнэнэн турар. Бу сыл бүтүүтэ барыта түҥэтиллиэхтээх диэн кэпсээтэ.
Уонна түмүктүүр «кэлэр 2026 туруоруллар сыаллар» диэн ыйытыыга бу курдук хоруйдаата:
Эдэр ыччаппытыгар, анал байыаннай дьайыыга сылдьар уолаттарбытыгар көмөлөһүү чэрчитинэн барытын толоруохпут. Бэйэбит Бэдэрээлинэй бырагырааммаларга кыттыыны ылабыт, олору тиһэҕэр диэри тириэрдэн түмүктүөхтээхпит. Холобур, былырыын 50 мөлүйүөннээх «Тэтим» түөлбэҕэ тутууну саҕалаабыппыт, ону түмүктүөхтээхпит. Маны таһынан «Проект поддержки местных инициатив» мунньахтарбыт буолан аастылар. 2 бырайыагы Үп министиэристибэтигэр биэриэхпит. Ону таһынан «Путь героя» диэн килэмиэтир курдук усталаах дьон хаамар, сылдьар сирин оҥороору гынабыт. Уонна «Оҕо саас искибиэригэр» реконструкция онорон фонтан туруораары гынабыт
Манан ыйытыыбытын түмүктээтибит. Нэһилиэкпит баһылыгын кытта атах тэпсэн олорон кэпсэтэммит олус үөрдүбүт, махтанныбыт, инники туруоруммут сыалларын ситиһэригэр, тус олоҕор, үлэтигэр ситиһиини баҕардыбыт. Михаил Артемьев биһиэхэ эмиэ үөрэхпитигэр үрдүк ситиһиилэри баҕаран туран үөрэн-көтөн атаарда.
Айта ДЬЯКОНОВА, Лилиана ЯКОВЛЕВА,
Дайаана МИХАЙЛОВА
X кылаас, «АЛиК» медиа-киин,
Л.В. Киренскэй аатынан Амматааҕы лиссиэй
keskil14.ru