Ааспыт нэдиэлэҕэ Аммаҕа «Мин идэм — IT» диэн ааттаах саҥа технологиялар хайысхаларынан V өрөспүүбүлүкэтээҕи күрэхтэһии сүүмэрдиир түһүмэҕэ түмүктэннэ. Кыайыылаах хамаанда өрөспүүбүлүкэтээҕи күрэхтэһиигэ кыттар быраабы ылла. Онно кыайбыттар түргэн дойдуга баар бастыҥ үөрэх кыһаларыгар киирэр кыахтаныахтара.
Аммаҕа Саха сиригэр эрэ ыытыллар «Мин идэм — IT» диэн ааттаах саҥа технологиялар хайысхаларынан идэни талыыга, ыччаты уонна саҕалааччы урабаанньыттары көҕүлүүр V өрөспүүбүлүкэтээҕи күрэхтэһии сүүмэрдиир түһүмэҕэ буолла. Тэрийээччилэринэн «Технопарк «Якутия» исписэлиистэрэ, саҥаны киллэрии, сыыппаралааһын сайдыытын, сибээс технологияларын министиэристибэтэ уонна судаарыстыбаннай, үөрэх тэрилтэлэрэ, сайыннарар кииннэрэ буолаллар. Маннык күрэхтэһии үс сыл устата Дьокуускай куоракка, оттон былырыыҥҥыттан саҕалаан улуустарга ыытыллар буолла. Тэрийэр бөлөх ааспыт сылга сэттэ улууска тахса сылдьыбыт буоллаҕына быйыл 16 улууһу хабар былааннаах.
Түмүк күрэхтэһии муус устар ыйга Дьокуускай куоракка IT – Паарка былаһааккатыгар ыытыллыаҕа. «Хакатон»ирдэбилинэн ыытыллар сонун күрэхтэһиигэ олох хардыытынан тэҥҥэ хаамсан иһэр саҥаны түргэнник ылынар 7-11 кылаас оҕолоро бэрт сэргэхтик кытыннылар.
Үөрүүлээх чааска улуус экономикатын салайааччы Роман Алексеев, нэһилиэк баһылыга Михаил Артемьев, баһылыгы солбуйааччы Альберт Яковлев, улуус юриһа Евгения Аргунова, Бизнес-инкубатор дириэктэрэ Зинаида Александрова, эдэр туристар станцияларын методиһа Саргылана Федорова, күрэхтэһиини тэрийээччи, сүрүннүүр эксперт Николай Жирков улуус, саҥа технологиялар сайдыыларыгар баҕа санааларын эттилэр. Эдэр исписэлиистэр бастакы күн оҕолору үөрэттилэр, маастар-кылаастары ыыттылар, презентация тутулун быһаардылар, бырайыагы көмүскүүргэ сүбэлэрин биэрдилэр. Оҕолор үс күн иһигэр элбэҕи биллилэр, саҥаны сатыыр буоллулар. Болугуртан, Соморсунтан уонна Амма үс оскуолаларыттан тоҕус хамаанда кытынна. Оҕолор икки күн устата түргэн сыһыарыы уонна «веб-сервис» саҥа бырайыактарын оҥорон таһааран көмүскээтилэр. Хамаандаҕа үс оҕо программист, дизайнер, менеджер оруолларын толорон кытыннылар.
Бырайыак ис хоһооно улуус аайы ураты буолан, аммаларга гражданственноска, туризмҥа уонна табыгастаах эйгэҕэ сыһыаннаах сорудах бэрилиннэ. Хамаандалар хайысхаларынан бэйэ баҕатынан тиэмэлэрин быһааран үлэлээтилэр. Тэрийээччилэр менеджмент тренерэ Петр Яковлев, сыһыарыылары оҥорор исписэлиис Арсан Тимофеев, брэнд дизайнер, брэнд-менеджер Степан Петров оҕолору салайан биэрдилэр. Оҕолор Бизнес-инкубатор дириэктэрэ Зинаида Александрова, резидент Николай Апросимов, эдэр туристар станцияларын методиһа Саргылана Федорова, Эмис оскуолатын учуутала Евдокия Тимофеева иннигэр көмүскээтилэр.
Түмүккэ «Бастыҥ программист» Тимур Чикальдин (лицей), «Бастыҥ дизайнер» Мария Олесова (лицей), «Бастыҥ менеджер» Акулина Макарова (Болугур) ааттар кыайыылаахтарынан буоллулар. Бизнес-инкубатор дириэктэрэ Зинаида Александрова анал бирииһин «АЛ8» лицей хамаандатыгар туттарда. Оттон хамаанданан бастакы миэстэни Амматааҕы лицей «АmgaLic» (Ньургун Филиппов, Мария Олесова, Данил Степанов), иккис миэстэни Болугур оскуолатын (Анна Макарова, Олеся Николаева, Акулина Макарова), үһүс миэстэни Амма 1N-дээх орто оскуолатын «IT — Korolenko» хамаандалара (Дьулус Николаев, Антон Макаров, Күндүл Атласов) ыллылар. Кыайыылаах оҕолор менеджер Ньургун Филиппов, дизайнер Мария Олесова, программист Данил Степанов «DOBI» үтүө дьыаланы көҕүлүүр бөҕү ыраастааһын уонна мас олордуутун бырайыактара кыайыылааҕынан тахсан муус устар ый саҥатыгар өрөспүүбүлүкэтээҕи күрэхтэһиигэ киирэр быраабы ыллылар.
Бастаабыт хамаанда
Иккис миэстэ
Үһүс миэстэ
Николай Жирков, өрөспүүбүлүкэтээҕи күрэхтэһии сүрүн эксперэ: «Саҥа технологиялар хайа баҕарар хайысхаҕа, идэҕэ баар буоллулар. Сүрүн сорукпут – ыччаты идэҕэ туһаайыы буолар. Оттон табыллыбыт бырайыактар олоххо киирэн хаалыахтарын эмиэ сөп. Холобура, аллараа бэстээхтэр саҥарбат, сытар ыарыһахтарга аналлаах суһал ыҥырыы сыһыарыытын оҥорбуттара. Биһиги хайысхабытынан күрэхтэһиилэр өрөспүүбүлүкэҕэ элбэхтик буолаллар. Улахан дьоҥҥо Арассыыйаҕа буолбут күрэхтэһиигэ 500-тэн тахса хамаанда биир саалаҕа үлэлээннэр Гиннесс рекорда олохтонон турардаах. Маннык улахан тэрээһиннэргэ эдэр дьон бэйэлэрин көрдөрдөхтөрүнэ улахан хампаанньалар бэйэлэригэр ылыахтарын сөп. «Sinet», «inDriver» урбаанньыт Арсен Томскайы, «MyTona» хампаанньаны төрүттээччи бырааттыы Ушницкайдары, Ростелекому кытта бииргэ үлэлэһэбит.
Биһигиттэн тахсыбыт ыччаппыт элбэх, «Fntastic», «Гидроид», «Автономные технологии» онтон да атын хампаанньа үлэһиттэринэн киэн туттабыт. Улахан күрэхтэһиигэ кыайбыттар түргэн ситим уонна саҥа технологиялар хайысхаларынан дойдуга баар бастыҥ үөрэх кыһаларыгар киирэр кыахтаныахтара. Талааннаах оҕолор үөрэнэн Сахабыт сиригэр саҥа технологиялары сайыннаралларыгар баҕарабын. Аммаҕа ыытыллыбыт күрэхтэһии үчүгэй түмүктээх буолла диэн астынан баран эрэбит» — диэн санаатын эттэ.
Ааптар: Алтана Артемьева