Үөһээ Дьааҥы улууһун оскуолаларыттан араас олимпиадаларга, күрэстэргэ ситиһиилээх 14 оҕо Москва куоракка күүлэйдээн кэлэр чиэскэ тигистибит.
Москваҕа тиийээппитин кытта улахан автобус көрсөн экскурсияҕа илдьэ барбыта. Кыһыл Болуоссакка сылдьан Кремль уонна Василий Блаженный храмын көрбүппүт. Киэһэ гостиницабытыгар хас биирдии хоско иккилии оҕо буолан түспүппүт. Хос аайы суунар душ, суунар тэрил, туалет, кыракый холодильник, полка баара ордук киһини үөрдүбүтэ. Аны дьоммутун кытта кэпсэтэрбитигэр бириэмэбит атын буолан ыарахаттардаах этэ. Ватсабынан эрэ кэпсэтэрбит. Ити курдук, күн аайы араас интэриэһинэй сирдэринэн экскурсиялыы барабыт.
Иккис күммүтүгэр “Сколково” диэн аныгы технологиялары оҥорор кииҥҥэ сылдьан араас интэриэһинэйдэри көрөн сөхтүбүт. Холобур, биллиилээх спортсмен, олимпийскай чемпион Роман Костомаров протезтара манна оҥоһуллан тахсыбытын сөҕөбүт эрэ. Аан дойдутааҕы быыстапкаҕа ВДНХ паркатыгар, Арассыыйа саамай улахан МГУ университетыгар уонна Совет Федерации сылдьыбыппыт. Совет Федерации киирэрбитигэр паспорт ирдииллэр этэ. Валентина Андреевна Чукрова экскурсияны иилээн саҕалаан ыыппыта. Түмүккэ Е.А.Борисов аатынан оҕолорго блокнот биэртэлээбитэ. Ону таһынан, бэйэбит «Остров мечты» диэн дьиэ иһигэр баар араас атракционнардаах аралдьытар паркаҕа сарсыардаттан киэһээҥҥэ диэри күүлэйдээбиппит, оонньообуппут. Өссө Останкино телебашняны көрбүппүт. Хас сылдьыбыт миэстэлэрбиттэн бэйэбэр кыракый бэлэх ылынар этим. Куруутун өйдүү сылдьыам диэн.
Мин саамай сөбүлээн, интэриэһиргээн сылдьыбыт сирим “Остров Мечты” уонна Аан дойдутааҕы ВДНХ быыстапката. Хас биирдии оҕо курдук мин эмиэ араас аттракционнарга сылдьарбын олус сөбулүүбүн. Мин санаабар, «Остров мечты» кыра эрдэђинээҕи баҕа санааҕын толорор. Киһи онно сырыттаҕына аптаах сиргэ, остуоруйа дойдутугар сылдьар курдук сананаҕын. Оттон быыстапкаҕа хас биирдии субъект бэйэтин уратытын көрдөрөрө киһи интэриэһин олус тардар.
Ол курдук, 6 күнү быһа каникул кэмигэр хаһан да харахтаабатах улахан куоракка баран, илэ бэйэтинэн көрөн элбэх билиини ылан, элбэх саҥа доҕоттордонон, оонньоон-көрүлээн кэлбиппиттэн олуһун диэн үөрдүм. Москва куораты көрөн кэлбиппиттэн олох кэмсиниэм суоҕа. Биһигини көрө-истэ сылдьыбыт салайааччыларбар Светлана Васильевна Ноговицынаҕа уонна Мирослава Константиновна Гороховаҕа, улууспут баһылыгар В.М.Ивановка, үөрэх салалтатыгар улахан махталбын тиэрдэбин.
Маша МОРДОВСКАЯ,
X кылаас
Боронук орто оскуолата,
Үөһээ Дьааңы