Быйылгы үөрэх дьылыгар биһиги оскуолабыт «Алаас аныгы оҕотун иитии» бырайыагын олоххо киллэрии чэрчитинэн үгүс дьаhаллар ыытыллаллара былааннанар.
Алтынньы 9 күнүгэр эдэр чинчийээччилэргэ «Бырайыактар бэстибээллэрэ» ыытылынна. 5-11 кылаастартан 12 үөрэнээччи салайааччыларын кытта бэйэлэрин үлэлэрин көрдөрдүлэр уонна салгыы бырайыактарын олоххо киллэриигэ былааннарын кэпсээтилэр.
Бэстибээлгэ кэлбит ыалдьыттар, учууталлар үгүс боппуруос ыйыттылар уонна бу үлэлэрин олоххо киллэрэн оскуолабыт, нэһилиэкпит сайдыытыгар кылааттарын киллэрэллэригэр, өссө да үгүс оҕо актыыбынайдык кыттан билиилэрин науканы кытта сибээстииллэригэр баҕа санааларын эттилэр. Оҕолор чинчийиилэрин тиэмэлэрэ араас.
Тываттан кэлбит биология учуутала Надежда Владимировна Саак салайыытынан 10 кылаас үөрэнээччилэрэ Владимир Герасимов нэhилиэнньэ иhэр уутун састаабын, Милияна Рязанская кедр алаас сир почватыгар үүнүүтүн чинчийбиттэр.
Александр Ксенофонтов Яна Васильевна салайар драмтеатрыгар кыра кылаастан дьарыктаммытын түмүгэр театр үлэтэ оҕо сайдыытыгар, нэhилиэк култуурунай олоҕор оруолун ырыппыт.
11 кылаас үөрэнээччитэ Дайаана Мишкина медик идэтин баhылыыр баҕатын толороору математика учуутала Татьяна Дмитриевна Ногородовалыын «Математика в медицине», 9 кылаастан Алена Ксенофонтова, Ванесса Чувашова история учуутала Лидия Петровна Саввиналыын Улуу Кыайыы 80 сылын көрсө Аҕа дойду Улуу сэриитин кыттыылаахтарын бойобуой суолларын үөрэтии уонна сэрииттэн төннүбэтэх буойуттарга аналлаах пааматынньыктары көрүүгэ-харайыыга былааннарын кэпсээтилэр.
Саамай кыра кыттааччы 5-с кылаастан Амелия Мордускина «Саха, Чувашия, Татарстан остуоруйаларыгар Ый кыыhын уобараhа ойууланыытын тэҥнээн көрбүт чинчийиитэ сэҥээриини ылла.
Вика Рахматуллина муостан кыhан киэргэллэри оҥоруу, 6-с кылаастан Айтал Григорьев «Вкусная выпечка» бизнес-былаана – барыта олус интэриэһинэй үлэлэр.
Быйылгы үөрэх дьылыгар Хадаар орто оскуолатын үөрэнээччилэрэ бырайыактарынан Чурапчы улууһугар ыытыллар тэрээһиннэргэ элбэхтик кыттар былааннаахтар. Салгыы оҕолор үлэлэрин өрөспүүблүкэ таһымыгар тиийэн кыттар, кэпсиир соруктаах үлэ күүскэ ыытыллар. Өссө да элбэх оҕо кыттыыны ыларга бырайыактарын саҥа саҕалаан оҥоро сылдьаллар. Ордук элбэх үлэ нэһилиэкпит историятын чинчийиитигэр баар.
Бырайыктар бэстибээллэрин тэрийбит история уонна обществознание учууталыгар Лидия Петровна Саввинаҕа махтанабыт. Эрдэттэн сыаллаан-соруктаан учууталлары, оҕолору муспутугар.
Алёна КСЕНОФОНТОВА, VIII кылаас,
С.Д. Флегонтов аатынан Хадаар орто оскуолата, Чурапчы