Улахан Аан нэһилиэгин библиотекатыгар «Саха төрүт аһа-үөлэ» диэн 5-с кылаас үөрэнээччилэригэр анаан олус үчүгэй тэрээһин буолбута. Ол курдук, биһиэхэ «Көмүлүөк» түмсүү эбээлэрэ кэлэн, малиналаах тоҥ күөрчэх, алаадьы астыырга үөрэппиттэрэ.
Бастаан барытын остуолга бэлэмнээбиттэрэ. Күөрчэх хайдах оҥоһулларын кэпсээбиттэрэ. Онтон күөрчэҕи тоҥорорго бэлэмнээн, бэйэлэрэ олордубут малиналарынан киэргэтэн, таһырдьа таһаарбыппыт.
Алаадьы астаан саҕалаабыппыт. Хайдах кутарга, эргитэргэ үөрэппиттэрэ. Алаадьы буһарарга арыытын кыра гыныахха наада диэбиттэрэ. Биһиги кылаас оҕолоро бары киирбиппит, эбээлэр бары сахалыы былааччыйалаах этилэр.
Эбээлэри кытары көрсүһэр наһаа үчүгэй, кинилэр өбүгэлэр астарын астыырга үөрэтэллэр. Оҕолору үчүгэйдик ас астыырга үөрэтэллэр. Сахалыы баахыла астыырга үөрэтиэхтэрин баҕарабын.
Сахаяна ВАСИЛЬЕВА, М.Е. Васильева аатынан 2-с Малдьаҕар орто оскуолатын 5 кылааһын үөрэнээччитэ.