«Төрөөбүт тыл сүмэтэ» диэн С.Н. Донской аатынан учууталлар идэлэрин үрдэтэр институт уонна Дьокуускай куорат «Айыы кыһата» национальнай гимназията алын кылаас үөрэнээччилэригэр ыыппыт научнай-практическай кэмпэриэнсийэтигэр «Алгыстаах алаадьы» диэн дакылаатынан кыттан үһүс кылаас үөрэнээччилэригэр бастакы миэстэни ыллым. Салайааччым Н.Н. Михайлова.
Дакылаатым хаамыытыттан эһиэхэ суруйдахпына маннык: тиэмэбин этиэм иннинэ, алаадьы туһунан ыллаатым. Эбэм Мария Афанасьевна уот иччитигэр Хатан Тэмиэрийэҕэ алаадьы биэрэ-биэрэ алгыыр тылларын этэн иһитиннэрдим.
Дакылааппар алаадьы астанар сэлиэһинэй уонна дьэһимиэн бурдуктарын тэҥнээбитим. Сэлиэһинэй Саха сиригэр ханна үүнэрин билбитим, алаадьыны ханнык кэмҥэ астыылларын ыйыталаспытым, бэйэм алаадьы буһарбыппын суруйбутум. Түмүкпэр сэлиэһинэй туһунан хоһоон айбытым. Дакылааппын Жанна Семёновна видеоҕа устан ыыппыта.
Үлэлэри көрүү түмүгүнэн бастакы миэстэ буолбуппуттан олуһун үөрэн, эһигини кытары үөрүүбүн үллэстэбин.
Авелия Кириллина, 3 кылаас үөрэнээччитэ, Ороһу.