Сэтинньи 9 күнүгэр А.П. Лыткина аатынан «Ырыа» нэһилиэк айымньытын дьиэтигэр “Театр+” бырайыак чэрчитинэн 11 төгүлүн «Үөрэҕи-билиини үйэтитиэххэ, тылбыт баайын, кэрэтин туойуохха» инсценировка күрэҕэ буолан ааста.
Туруоруулар норуот суруйааччыта, прозаик В.С. Яковлев – Далан 95, саха биллиилээх поэта, суруйааччыта Г. Г. Вешников – Баал Хабырыыс 105, норуот суруйааччыта Н. Г. Золотарев – Николай Якутскай 115 үбүлүөйдээх сылларыгар ананнылар.
![](https://keskil14.ru/wp-content/uploads/2023/11/568e6f16-722d-462e-9893-287f71ab7020-1024x682.jpg)
Г.Д. Протодьяконов аатынан I-X кылаас үөрэнээччилэрэ сэргэх, кэрэхсэнэр нүөмэрдэри туруоран, көрөөччүлэри сэргэхситтилэр.
Ол курдук, алын кылаастар Г. Г. Вешников – Баал Хабырыыс хоһооннорунан литературнай-музыкальнай дьүһүйүү көрдөрдүлэр.
V-VII кылаастар Н. Г. Золотарев – Николай Якутскай айымньыларынан инсценировка, VIII-X кылаастар В.С. Яковлев – Далан «Үбүлүөй иннинэ», «Дьикти саас» айымньылар быһа тардыыларын туруордулар. Бу айымньылар «Учуутал уонна уһуйааччы» уонна «Үлэ» сылларыгар туһуланнылар.
![](https://keskil14.ru/wp-content/uploads/2023/11/f88440df-dd66-4f40-9fb2-b2e7d9103efb-1024x682.jpg)
Дьүүллүүр сүбэ Анастасия Николаевна Ефремова, саха тылын уонна литэрэтиирэтин учуутала, Елена Николаевна Тотонова, «Ырыа» НАДь дириэктэрэ уонна Анна Николаевна Дорбохова, педагог-бибилэтиэкэр туруоруулары сыаналаатылар.
Түмүккэ алын кылаастарга:
«Чулуу аат» — II кыл. (М.В. Оконешникова)
«Бастыҥ туруоруу» — III кыл. (Д.А. Шеломова)
«Бастыҥ ырыа-тойук» — IV кылаас (С.В. Неустроева)
«Кэскиллээх ааҕаачылар» — I кылаас (Ф.Н. Миронова).
Орто кылаастарга:
«Чулуу аат» — VI кыл. (Н.В. Мохначевская)
«Бастыҥ туруоруу» — VII кыл. (К.М. Борисова)
«Бастыҥ декорация» — V кыл. (А.В. Новгородова)
Улахан кылаастарга:
«Чулуу аат» — X кыл. (А.Е. Прокопьева)
«Бастыҥ туруоруу» — VIII кыл. (В.Я. Яковлев)
Биирдиилээн хоһоон ааҕааччылар, инсценировка дьоруойдара анал ааттары туттулар.
Бары кыттыбыт кылаастарбытыгар, тэрийээччилэргэ уонна «Ырыа» НАДь киинин үлэһиттэригэр махтанабыт.
Александра Чаҕылысова, X кылаас,
«Алаҕар Кэскилэ» медиа киин
Алаҕар орто оскуолата
Чурапчы