Сэтинньи 11 күнүгэр “Айыы Кыһата” национальнай гимназияҕа Татарстан өрөспүүбүлүкэтин делегацията ыалдьыттаата. «Түмэн» оҕо хамсааһына саха ытык үгэһинэн алаадьынан айах тутан көрүстүлэр.
Оҕо иитиитин кэрэхсэбиллээх ньымаларын, саха норуотун олохсуйбут эйгэтин туһунан киэҥ ис хоһоонноох кэпсэтиилэр ыытылыннылар. Дириэктэр Лидия Петровна Шамаева үөрэнээччилэрин кытта оскуола үлэтин-хамнаһын, уратытын сиһилии билиһиннэрдилэр. Сахалыы эйгэни тэрийии сүрүн өрүттэригэр тохтоотулар. Ол курдук, махталынан ылынан, тапталынан сирдэтэн сылдьар киһи куруук эрэл күүстээх диэн оскуола тиэрдэр сүрүн санаатын Сандаара Неустроева билиһиннэрдэ. “Удьуор утум” бырайыак ис хоһоонун арыйан, сыллата ыытыллар муҥха туһунан кэпсээбиттэрин ыалдьыттар олус сонургуу иһиттилэр. Собону хатырыктаан, үөстээн эмиэ көрдөрдүлэр.
“Саха литэрэтиирэтигэр оҕо уобараһын тилиннэрии” диэн хаартыска быыстапкатын Марк Колесов билиһиннэрбитин улаханнык сэҥээрдилэр. Оскуола үгэскэ кубулуйбут “Айан дьарык” бырайыагын дириэктэри солбуйааччы Светлана Кимовна Игнатьева олус кэрэхсэбиллээхтик кэпсээтэ. Уонна “Айыы Кыһата” гимназия ыыппыт күрэхтэһиитигэр миэстэлэспит үөрэнээччи дипломун Татарстан үөрэҕин миниистиригэр Ильсур Гараевич Хадиуллиҥҥа туттарда. Ыалдьыттарга анаан Уруйдаана Павловна Харитонова салайааччылаах “Кыл кырыымпа” бөлөх кырыымпалаан иһитиннэрдэ. Бу бөлөххө улахан дьону кытта оскуола оҕолоро бииргэ дьарыктаналлар. Тамара Филипповна Степанова салайааччылаах “Эбээ түмсүүтэ” кыыс оҕо хаппахчытын тигэр ииһин олус биһирээтилэр.Көрсүһүү түмүктүүр түһүмэҕинэн оскуола сэһэнньитэ Наталья Анатольевна Николаева тэрийэр “Холумтан олордуу” сиэрин-туомун билистилэр. Бу курдук, тэттик кэм иһигэр, Татарстан өрөспүүбүлүкэтиттэн кэлбит ыалдьыттарбыт сахалыы оскуола ис эйгэтин дириҥник билистилэр. Көрсүһүү түмүгэр ыраахтан сылдьар ыалдьыттарбыт оскуола хас биирдии сэһэнин умсугуйа көрөн, оҕолор төрөөбүт тылларынан иитиллэр эйгэлэрэ дьоһуннаахтык тэриллибитин бэлиэтээтилэр.
Сандаара Неустроева, 10 «в» кылаас үөрэнээччитэ, «Айыы кыһата» национальнай гимназия, Дьокуускай