Ааспыт нэдиэлэҕэ «Айыы Кыһата» гимназия 8-с «г» уонна 9-с «в» кылааһын үөрэнээччилэрэ Саха Өрөспүүбүлүкэтин ыксаллаах быһыыны-майгыны сэрэтэр уонна туоратар кииҥҥэ интэриэһинэй экскурсияҕа сырыттылар. Бу тэрээһин «Гид по образованию и карьерному росту» диэн бырайыак чэрчитинэн ыытылынна. Бу бырайыак улахан кылаас оҕолорун араас идэлэри кытта билиһиннэрэр, профориентация хайысхалаах араас хабааннаах көрсүһүүлэри тэрийэр.
Бу киин сүрүн үлэтин инспектора Геннадий Гаврильевич Алексеев быыһааччы, баһаарынай идэтин туһунан кэпсээтэ. Оҕолор олус сэҥээрэн иһиттилэр. Манна 3 экспозиционнай баһаарынай сулууспа, гражданскай оборона уонна быыһааччы саалалара баар. Манна историяттан саҕалаан билиҥҥи кэмҥэ диэри үлэлэрэ-хамнастара сырдатыллыбыт. Туттар маллара, экипировкалара, элбэх хаартыскалаах стендэлэр оҕолор болҕомтолорун тарта. Ууга быыһыыр жилети, противогаһы хайдах сөпкө кэтэри көрдөрдө. Оҕолор дьиҥнээх түбэлтэлэри сэргээн иһиттилэр – Карина Чикитованы хайдах көрдөөн булбуттарын, водолазтар тустарынан, дьону уста турар муустан вертолеттан быа түһэрэн быыһыылларын, ону тэҥэ баһаар кэмигэр суорума суоламмыт хорсун-хоодуот баһаарынайдар тустарынан.
Дьиҥнээх быыһааччы хорсун, күүстээх, барыны бары сатыыр, ыарахаттартан чаҕыйбат, мындыр уонна тулуурдаах буолуохтаах. Кини ханнык баҕарар усулуобуйаҕа чаҕыйбакка үлэтин толорор, дьону быыһыыр үрдүк аналлаах. Бу идэни олоҕу дьиҥ чахчы таптыыр киһи баһылыыр диэн Геннадий Гаврильевич тоһоҕолоон эттэ.
Бибилэтиэкэ уонна оҕолор ааттарыттан Саха Өрөспүүбүлүкэтин ыксаллаах быһыыны-майгыны сэрэтэр уонна туоратар киин үлэһиттэригэр Надежда Ивановна Тарасоваҕа уонна Геннадий Гаврильевичка махталбытын тиэрдэбит.
Татьяна Сидорова,
3 №-дээх «Мир приключений» бибилэтиэкэ сүрүннүүр бибилэтиэкэрэ.