Биһиги, Улахан Аан нэһилиэгин 2022 сыллаах выпускниктара, быйыл Александр Самсонов-Айыы Уолун скверигэр 14 хатыҥ маһы олортубут.
Саас буолан, сир тымныы диэн, кылааспыт уолаттара 4 хонук иннинэ буору хаһан, мас олордор миэстэбитин бэлэмнээбиттэрэ. Төрөппүттэрбит нэһилиэк тыраахтарынан маспытын аҕалан көмөлөспүттэрэ. Бу тэрээһини «Айылҕа оҕото» экологическай-култуурунай бырайыак диэн ааттаабыппыт. Ол курдук Айыы Уолун ырыатын «Айылҕа чочуйбут оҕото буоламмын…» тылларыттан бырайыак ааттанна.
Оскуола үөрэнээччилэрэ, учууталлара Айыы Уолун ырыаларын үөрэтэн, мас олордор күммүт ырыалаах-тойуктаах, үҥкүүлээх бэрт сэргэхтик ааспыта. Бу үүннэрбит мастарбыт билигин тиллэн эрэллэриттэн үөрэбит. Бастакы күүстээх ардах иҥэмтэлээх уутунан өссө улаатан, тупсан, киэркэйэн, нэһилиэк кэрэ көстүүтэ буола улааталларыгар баҕарабыт.
Бииргэ үөрэммит доҕотторбор баҕа санааҕыт туоларыгар, туруоруммут сыалгытын ситиһэргитигэр баҕарабын!
Саша ЛЬВОВА,
М.Е. Васильева аатынан 2-с Малдьаҕар орто оскуолатын 11 кылааһын үөрэнээччитэ.