Ытык Күөлгэ «Дьулуруйар Ньургун Боотур» саҥа стадиоҥҥа күрэс төрүт көрүҥнэригэр XXII «Манчаары оонньууларын» арыллыыта үгүс элбэх киһини түмтэ, сомоҕолоото.
Өрөспүүбүлүкэбит Ил Дархана Айсен Сергеевич Николаев тыһыынчанан ахсааннаах мустубут дьон иннигэр туран эҕэрдэ тылын эттэ. Биһиги Ил Дархаммыт Саха сирэ спорт көрүҥнэрин сайыннаран, бүтүн Араассыыйа, аан дойду таһымыгар таһааран, норуоттары түмэр, сомоҕолуур кыахтаммытын туһунан бэлиэтээн эттэ.
– 22-с төгүлүн ыытыллар «Манчаарыбыт оонньуута» Таатта сиригэр буолара дириҥ ис хоһоонноох. Алексей Кулаковскай-Өксөкүлээх Өлөксөй, Платон Ойуунускай, Алампа курдук дьон төрөөннөр, бу мантан саха өйө-санаата сайдыбыта. Таатта сиригэр былыр-былыргыттан саха култуурата, саха ис туруга иитиллэн тахсыбыта, – диэн Таатта өрөспүүбүлүкэ сайдыытыгар суолтатын туһунан эттэ.
Айсен Сергеевич: «Бу сылларга үгүс үлэни ыытаммыт, биир сомоҕо буоламмыт, олоххо дьулуурбутун көрдөрөммүт, ыарахан күннэрбитин туорааммыт, «Манчаары оонньуулара» саҕаланан эрэллэр. Мин Таатта дьонугар дириҥ махталбын биллэрэбин«, – диэн Таатта дьонугар ис сүрэҕиттэн махтанна.
– Үтүө үгэс быһыытынан «Манчаары оонньуулара» буолар сирдэригэр социальнай-экономическай суолталаах объектар үлэҕэ киирэллэр. Аҕыйах сыл иһигэр манна бэртээхэй стадион тутулунна. Саха сирин спордун дыбарыаһа баар буолла. «Саһыл Уйалаах» ипподром тутулунна. Аҕыйах сыллааҕыта Арассыыйа премьер миниистирэ Михаил Мушистин бэйэтэ дьаһайан, А.Е. Мординов аатынан Тааттатааҕы лиссиэй тутуллан үлэҕэ киирдэ. Мин ис сүрэхпиттэн этэбин – бу бэртээхэй тутуулар Таатта дьонугар- сэргэтигэр көмөлөһүөхтэрэ, оҕолоргутун сайыннарыахтара. Инники өттүгэр Таатта сирэ саха култууратын түмэн, өссө даҕаны бу ытык сиртэн улуу дьоннор тахса туруохтара, Сахабыт сирин аатырдыахтара, – диэн өрөспүүбүлүкэбит Ил Дархана Айсен Сергеевич Николаев эрэлин биллэрдэ.
Алёна ТАППЫРОВА, VIII кылаас, Уолба, Таатта,
«Кэскил» оҕо пресс-киинин эдкора
Хаартыска А.С. Николаев телеграм ханаалыттан туһанылынна https://t.me/aisen_nikolaev