Кэбээйи улууһун Мукучу нэһилиэгин И.Е. Левин аатынан Танара орто оскуолатын 11 кылааһын үөрэнээччитэ Айсен Местников Ил Дархан Харыйатын кыттыылааҕа.
Айсен кыра сааһыттан үҥкүү ансаамбылыгар, хапсаҕайга дьарыктаммыта. Араас күрэхтэргэ НПК-ҕа көхтөөхтүк кыттар. 2021 с. өрөспүүбүлүкэтээҕи Барахов ааҕыыларыгар 2 миэстэни ылбыта. Быйыл иккис төгүлүн «Смотри, это Россия» видео күрэххэ кытынна. Уонна кини биир уратыта диэн быстах туттар харчытын бэйэтэ үлэлээн булунар. Ол туһунан этиитэ «Бэлэм буол» сурунаалга тахсыбыта.
Ил Дархан Харыйатыттан олус астынан кэлбит: «Биһигини хотугу улуустары кытта олохтообуттара. Миигин кытта гимназияттан Дамир Гуляев, Ангелина Ксенофонтова бааллара. Биир дойдулаахтарбытын, Сэбээн Күөл герой оҕолорун Аниврин Акимовы, Сергей Кузнецову кытта билистибит. Олус интэриэһинэй экскурсияҕа сырыттыбыт. Уопсайынан, остуоруйа дойдутугар сылдьан кэлбит курдукпун. Оскуолам Саҥа дьылын баттаһа кэллим. Миигин Ил Дархан Харыйатыгар талан ыыппыт учууталларбар, оскуолабар ис сүрэхпиттэн махтанабын. Саҥа сыл үтүөнү эрэ аҕаллын!».
«Арылы» пресс-бөлөх, Кэбээйи улууһа, Мукучу.