Тохсунньу 26-31 күннэригэр «Сосновый бор» оҕо сынньанар уонна чэбдигирдэр киинигэр «Кэскил» медиа-оскуола «Мы едины» – «Биир сомоҕо» диэн 2026 сылга бастакы смената буолан түмүктэннэ. Бу сменаҕа кыттан иҥэриммит уопуппун, билиибин уонна ситиһиилэрим туһунан кэпсиэхпин баҕарабын.
Бэйэм эксээмэннээх кылаас үөрэнээччитэ буоларбынан, лааҕырга барыам иннинэ үөрэхпэр олох күүскэ умса түспүтүм. Ол эрээри, медиа эйгэҕэ улахан интэриэһим, саҥаны билэргэ дьулуһуум барытын быдан үрдүктүктэрин көрдөрдө. Хата, сыралаһан үөрэммитим ситиһиибин эрдэттэн оҥорбут эбит дии санаатым.
Смена уопсайа алта күн буолла. Кылгас да кэм буоллар, бу сырыы миэхэ олохпор саҥа кэрдиис кэми арыйда. Лааҕырга араас улуустартан мустубут оҕолору, уопуттаах юнкордары уонна «Кэскил» эдэр куратордарын кытта алтыстым. Элбэх саҥа доҕоттордонон, биир санаалаах дьону буллум. Кинилэри кытта кэпсэтии, санаа атастаһыы билиибин кэҥэттэ, айар дьоҕурбар саҥа күүс киллэрдэ.
Смена саҕаланыыта юнкордары барыбытын хамаандаҕа араарбыттара. Мин бастакы худуоһунньуктар хамаандаларыгар киирбитим. Саха норуотун суруйааччыта Дмитрий Кононович Сивцев-Суорун Омоллоон «Бэйэтэ эмтиэкэ» айымньытынан комикс оҥорорго үлэлээтибит. Комикс оҥоруута диэн, дьиҥэр, олус элбэх үлэни, айар дьоҕуру ирдиир. Манна хас биирдии киһи бэйэтин кыаҕын толору көрдөрдө: ким эрэ дьоруойдары айда, ким эрэ диалогтары суруйда, ким эрэ өҥнөрүн талыыга үлэлээтэ.
Мин бу хамаандаҕа раскадровщик диэн эппиэтинэстээх оруолу толордум. Ол эбэтэр, сценарийы ойуулаан көрдөрүүгэ, хас биирдии сцена хайдах көрүҥнээх буолуохтааҕын көрдөрөр эскизтэри, сиһилии ойуулары оҥорууга үлэлээтим. Бу мин бастакы уопутум этэ эрээри олус сөбүлээтим! Хас биирдии кадр кэннинээҕи ис санааны, персонажтар иэйиилэрин, айымньы логикатын ойуу нөҥүө тиэрдии уустук эрээри кэрэхсэбиллээх үлэ эбит. Наставниктарбыт сүбэлэринэн-амаларынан, бэйэбит аҕыйах да буолларбыт, үлэбитин ситиһиилээхтик оҥордубут дии саныыбын. Хамаандабыт түмүллүбүтэ, биир сыалга дьулуспута туспа ситиһии.
Сменаны түмүктүүр улахан тэрээһиҥҥэ юнкордар хамаандалар үлэлэрин түмүгүн көрдөрдүлэр, бастыҥнар наҕараадаланнылар. Бу күн мин үөрүүм муҥура суох этэ. Тоҕо диэтэххэ, смена уопсай үлэтин түмүгүнэн «Тексты суруйарга бастыҥ юнкор» аатын иҥэрдилэр.
Бу наҕараада миэхэ соһуччу буолла. Инникитин суруйар, анаарар, толкуйдуур, мантан иннэ уруһуйдуур сатабылларбын өссө сайыннарыахтаахпын диэн улахан эбээһинэһи, эппиэтинэһи сүктэрдэ.
«Кэскил» медиа-оскуолаҕа улаханнык махтанабын. Бу киһини сайыннарар, саҥа билиини биэрэр, айар дьоҕуру арыйар, доҕордоһууну күүһүрдэр оскуола. Бары тэрийээччилэргэ, наставниктарга уонна доҕотторбор умнуллубат кэм иһин барҕа махталбын тиэрдэбин. Инникитин даҕаны биир сомоҕо буолан, сахалыы медиа эйгэни сайыннарарга күүспүтүн-уохпутун ууран үлэлиэххэйиҥ!
Лилия МАРКОВА, IX кылаас, А.П. Илларионов аатынан
Хайахсыт орто оскуолата, Чурапчы