Дьокуускай куоракка быстах дьайыыга сылдьар байыастарга көмөнү оҥорор «Якутия с тобой» штаб 2022 сыл балаҕан ыйыттан тэриллэн үлэлиир. Штаб иһинэн барыта 1600-тэн тахса волонтер үлэлээн ааста. Билигин даҕаны штаб иһигэр үлэ ньиргиччи бара турар.
Дьокуускай куорат олохтооҕо, 73 саастаах биэнсийэлээх Светлана Скуратова ыам ыйын 11 күнүттэн күн бүгүҥҥэ диэри штабка хара сарсыардаттан киэһээҥҥи диэри үлэлиир. Волонтер соруга — маскировочной сетка өрөөһүнэ.
— Биэнсийэҕэ тахсыахпар диэри аптекаҕа үлэлээбитим. Оҕолорум, сиэннэрим атын куоракка олороллор. Хайдах, бу үлүгэрдээх буола турдаҕына, дьиэбэр налыйан олоруохпунуй. Мин сылдьыбат, наадыйбат дьону сөҕөбүн. Дьүөгэлэрбин да ыҥыра сатаабытым. Биир дьүөгэм кэлэн баран, күн аҥара үлэлээн, илиим ыалдьар диэн аккаастаабыта. Илиигинэн хамсана үөрэннэххинэ, төбөҥ, мэйииҥ да түргэнник үлэлиир буолар. Онон туох баар кыахпынан барытынан көмөлөһөбүн.
Дьокуускайдааҕы тыа хаһаайыстыбатын техникумун 1 куурсун устудьуоннара Кеша Винокуров уонна Артем Потапов үөрэхтэрин кэннэ кэлэн, барар таһаҕаһы наардыырга көмөлөһөллөр. Артем бэйэтэ Дьааҥы улууһун Баатаҕайыттан төрүттээх:
— Оскуолаҕа үөрэнэ сылдьан, оҕолор буолан байыастарга сурук, хоһоон айан суруйарбыт. Уонна олохтоох дьаһалтаҕа баһыылка хомуйарга көмөлөһөрбүт. Онон волонтер үлэтин билэбин. Быстах дьайыыга биһиги улууспутуттан уолаттар сылдьаллар, олор истэригэр мин билэр дьонум эмиэ. Ол иһин биһиги хас биирдиибит кинилэргэ көмө оҥорорбут иэспит дии саныыбын.
Штаб хомуйбут баһыылкалара, таһаҕаһа «Якутия» авиакомпания нөҥүө Москваҕа опорнай пууҥҥа тиэрдиллэр. Онтон Москваттан волонтердар хас да хайысханан уонна сиринэн салгыы ыыталлар.
Биһиги «Якутия с тобой» байыаннай дьайыыга сылдьар байыастарга көмөнү ыытар штаб хос бэрэссэдээтэлин Анна Николаевна Ефимованы кытары кэпсэттибит.
— «Якутия» авиакомпания миэстэ таҕыста да, таһаҕаһы буор-босхо ыыта турар. Онон кинилэргэ махталбыт улахан. Бу күһүн аадырыстаммыт баһыылкалары ыла сылдьыбыппыт. Онно кэргэттэр, төрөппүттэр баһыылка оҥорон, аадырыстаан ыыппыттара. Билигин ону тохтотон турабыт. Бастаан үчүгэйдик үөрэтэн көрөн бараммыт, салгыы аадырыстаммыт баһыылкалары тутарбытын сөргүтүөхпүт.
Тоҕо волонтер буоллум?
Аан маҥнай уоппускам бириэмэтигэр улахан баһаардар турбуттарыгар, хайдах уоппускабын мээнэ күүлэйгэ ыытыахпыный диэн санааттан, туһалааҕы оҥордорбун диэн волонтердар штабтарыгар кэлбитим. «Якутия с тобой» штаб үлэтин аан маҥнай Ирина Егоровна Саввина, билигин «Илии сылааһа» диэн иистэнэр сыах салайааччыта, тэрийбитэ, көхтөөх, ханнык да ыарахан дьыалаттан туора турбат общественниктары бэйэтин тула түмпүтэ: Айыл Дьулурҕаны, Айыллаан Винокуровы, Ольга Григорьеваны, Мария Емельянованы. Бу иннинэ бары бииргэ баһаарга эмсэҕэлээбиттэргэ көмөлөспүт буоламмыт, түмсүүлээхтик үлэбит саҕаламмыта.
Саамай кырдьаҕас волонтер 90 сааһын ааспыт кырдьаҕас, онтон саамай эдэр — уһуйаан оҕото
Штабка волонтердуу сааһыттан тутулуга суох кэлэллэр. Саамай аҕа саастаах 90 сааһын ааспыт кырдьаҕас этэ, онтон саамай кырачаан волонтер — уһуйаан оҕото. Эрдэ биэнсийэлээхтэр үксэ сылдьар эбит буоллахтарына, билигин ыччат эмиэ көмөлөһөр буолла. Волонтер баҕа өттүнэн кэлэр, хамнаһа суох, босхо үлэлиир. Штаб үлэтэ республикабыт олохтоохторо көмөлөрүнэн тэриллэн олорор. Хас биирдии улуус олус үчүгэйдик үлэлиир. Манна бэлиэтиэхпин баҕарабын, саамай көхтөөх, элбэх таһаҕаһы ыыппыт улуустары: Амма, Алдан, Нам, Уус-Алдан, Өлүөхүмэ, Кэбээйи улуустарын.
Аҥардас суругу тутан, уолаттарбыт санаалара бөҕөргүүр
Баҕа өттүнэн барааччыларга, контрактниктарга эмиэ көмө оҥоһуллар. Госпитальга сытар уолаттарбытыгар эмиэ көмөлөһөбүт. Швейнэй цехтар Дзержинского уул. 76-С дьиэтигэр, манна штабка эмиэ иистэнэбит. Короленко уул. 6 №-дээх дьиэтигэр массетка өрөллөр. Олус туһалаах блиндажнай чүмэчилэри эмиэ оҥорон, хомуйан ыытабыт.
Үөрэх тэрилтэлэрэ, ол иһигэр оскуолалар, атын да тэрилтэлэр бары көмө оҥоро олороллор. Дьокуускай куорат Маҥан нэһилиэгэ «кураанах душ» оҥорон туттарбыта. Нэһилиэктэр кытыаны кытары кыра мөһөөччүккэ уган ыыталлар. Харысхаллары ыыталлар. Үөрэнээччилэр суруктары суруйан туттараллар. Бу барыта — байыастарга сүрдээх туһалаах, аҥардас сылаас тыллаах суругу тутан, уолаттарбыт санаалара бөҕөргүүр, эрэллэрэ улаатар. Билигин «Ичигэс кыһын» диэн акцияны ыыта олоробут. Онон, тохтоон хаалбакка, бары бииргэ, биир санаанан, үлэбитин ыһыктыбакка, салгыы үлэлии туруоҕуҥ!
keskil14.ru