Атырдьах ыйын 24 күнүгэр үөрэх үлэһиттэрин Атырдьах ыйынааҕы мунньахтарын иһинэн ыытыллыбыт өрөспүүбүлүкэ агро хайысхалаах оскуолаларын мунньаҕа кэтэхтэн ыытылынна. Барыта холбоон 30-ча агрооскуола салайааччылара быһа холбонон сибээскэ таҕыстылар. Мунньаҕы «Юные якутяне» өрөспүүбүлүкэтээҕи ресурснай киин иилээн-саҕалаан ыытта.
Бастатан туран, ресурснай киин методиһа Марина Сивцева өрөспүүбүлүкэ агро хайысхалаах оскуолаларын 2020-2021 сс. үөрэх дьылыгар үлэлэрин түмүгүн анаалыһын билиһиннэрдэ уонна көрдөрүүгэ улахан түһүү суоҕун бэлиэтээтэ.
Быйылгы үөрэх дьылыгар аграрнай хаһаайыстыбанан дьарыктанар 96 оскуола баар, олор ахсааннарыгар 37 — малокомплектнай оскуола, 18 — Арктика оройуоннарын оскуолалара киирэллэр. 96 агрооскуолаттан бэйэтин хаһаайыстыбатын (КФК, ССПК, ООО, СХПК) 32 оскуола тэринэн олорор. Буоларын курдук, саамай элбэх быраһыаны дьиэ сүөһүтүн иитиитинэн дьарыктананар оскуолалар — 77 % уопсай көрүҥтэн ылаллар, онон сылгыны, ынах-сүөһүнү, дьиэ табатын, сибиинньэни, көтөр кыылы көрүү бастыҥнар кэккэлэригэр киирэр. Маны таһынан өрөспүүбүлүкэ агрооскуолалара үүнээйини олордууга — 46 % үлэлииллэр.
Аны үөрэх чааһыгар киирдэххэ, агротехнологическай хайысхалаах үөрэххэ туттарсан киирии түмүгүнэн уон бастыҥ көрдөрүүлээх оскуолалар ахсааннарыгар Н.А. Брызгалов аатынан Индигиир орто оскуолата, Е.М. Ларионов аатынан Салбаҥ орто оскуолата, Н.Н. Тарскай аатынан Баатаҕай орто оскуолата, Е.П. Неймохов аатынан Мэҥэ-Алдан орто оскуолата, Тамалакаан орто оскуолата, С.П. Ефремов аатынан Булгунньахтаах орто оскуолата, Модут орто оскуолата, Е.П. Сивцев аатынан 2-с Хомустаах орто оскуолата, Г.Н. Чиряев аатынан Хоро орто оскуолата, Н.К. Седалищев-Дьүөгэ Ааныстыырап аатынан Кэнтик орто оскуолата киирдилэр. Онтон 31 оскуолаттан аграрнай хайысхалаах үөрэххэ киирии суох. Онон бу боппуруос эмиэ көтөҕүлүннэ. Аны үөрэнээччилэр Бүтүн Арассыыйатааҕы олимпиадаларга кыайыылаах эбэтэр миэстэҕэ тахсар түгэннэрэ олус аҕыйах диэн эмиэ бэлиэтээн аһардылар.
Аны үөрэх кабинеттарынан бүтүннүү 64 оскуола тэринэн олорор, 32 оскуолаҕа күн бүгүҥҥэ диэри бэйэтэ туспа тэриллээх үөрэтэр кылааһа суох. Манна үрдүк көрдөрүүлээх тэриллиилээх оскуолаларынан И.Е. Федосеев-Доосо аатынан Дириҥ агрооскуолата, Уус-Таатта орто оскуолата, М.Т. Егоров аатынан Үөһээ Бүлүү орто оскуолата, Куокуну орто оскуолата уо.д.а. ааттаннылар. Бу оскуолаларга 4-тэн элбэх кабинекка үөрэнээччилэри агротехнологическай идэни баһылыырга үөрэтэллэр.
Кэлиҥҥи кэмҥэ табаны иитии, ыҥырыаны көрүү курдук сэдэх хайысхалар сайдан эрэллэрин М. В. Сивцева бэлиэтээн аһарда. Урукку сыллартан үлэлэрин көрдөрүүтүн үрдэппит оскуолалар эмиэ ыйылыннылар, 2020-2021 сс. үөрэх дьылын түмүгүнэн бастыҥ үлэлээх агро хайысхалаах оскуолаларынан А.Е. Слепцов аатынан Абый орто оскуолата, Боруулаах орто оскуолата, П.Н. Тобуруокап аатынан Нам орто оскуолата, Балыктаах орто оскуолата, И.С. Иванов Сунтаар 2-с нүөмэрдээх орто оскуолата, С.С. Сюльскай аатынан Сүлэ орто оскуолата, С.П. Ефремов аатынан Булгунньахтаах орто оскуолата, Балаҕаннаах орто оскуолата, М.Т. Егоров аатынан Үөһээ Бүлүү орто оскуолата, Тамалакаан орто оскуолата, Эйик орто оскуолата ааттаннылар.
Мунньах түмүгэр агро хайысхалаах оскуолалар дириэктэрдэриттэн учууталларга учуонайдар, тустаах исписийэлиистэр кыттыылаах элективнай куурустары тэрийии, тыа хаһаайыстыбатын Министиэристибэтэ кыттыылаах сэминээрдэри ыытыы, үрдүк квалификациялаах каадырдарынан малокомплектнай агрооскуолары хааччыйыы, агрооскуолалар өрөмүөннэригэр, лааҕырдары тутууга туспа квотаны көрүү, аһынан хааччыйыы өттүгэр: хоту оройуоттар оскуолаларын үрүҥ аһынан, оҕуруот аһынан хааччыйыы, сайыҥҥы бириэмэҕэ үөрэнээччилэри үлэҕэ ылыы туһунан үлэлээх буолуу киинин кытары сөбүлэҥ түһэрсии, таба ыстаадатын материальнай-техническай баазаларын бөҕөргөтүү, үөрэххэ киириигэ квота биэртэлээһини туруорсуу о.д.а. тустаах кэккэ этиилэр киирдилэр. «Төгүрүк остуол» түмүгүнэн кэпсэтии кыттыылаахтара киллэриллибит этиилэри өйүүллэрин биллэрдилэр.
СӨ үөрэх уонна наука миниистирэ И.П. Любимова көҕүлээһининэн балаҕан ыйын 15-30 күннэригэр үөрэх уонна производственнай хаһаайыстыбалар күрэхтэрэ ыытылларын тэрийээччилэр иһитиннэрдилэр. Манна өрөспүүбүлүкэ бары агро хайысхалаах оскуолалара кыттыыны ылаллара булгуччулааҕын тоһоҕолоон бэлиэтээтилэр.
Маны таһынан төгүрүк остуолга агрооскуолалар Сойуустарын дириэктэрэ Петр Дягилев, «Юные якутяне» өрөспүүбүлүкэтээҕи ресурснай киин дириэктэрин эбээһинэһин толорооччу Данил Жирков кыттыыны ыллылар.
Анна СЛЕПЦОВА.
keskil14.ru