Абый орто оскуолата 2015 сылтан агро хайысханан үлэлиир. Ынахтаахпыт, сылгылаахпыт, оҕуруот аһын үүннэрэбит, нэһилиэнньэҕэ килиэп астыыбыт.
Алтынньы 10 күнүгэр оскуола үөрэнээччилэрэ учууталларбытын кытта уолаттар — идэһэ өлөрүүтүгэр, кыргыттар — ис сууйуутугар сырыттыбыт. Сыл ахсын ис сууйарга, ырытарга сылдьар буоламмыт, бу үлэни сатыыбыт. Түргэнник, ыраастык туттарга учууталларбыт куруук үөрэтэллэр.
Биһиги оскуолабыт үөрэҕи уонна үлэни тэҥҥэ ситимнээн үлэлиир оскуола. Ол курдук, сүөһүлэрбитигэр сайын оттуубут, уолаттарбыт кыһыны быһа ынах, сылгы көрүүтүгэр көмөлөһөллөр, дал ыраастыыллар, от таһаллар. Кыргыттар ас астыырга үөрэнэллэр, килиэп атыылыыллар.
Мин санаабар, оҕону үлэнэн иитии оскуола кэнниттэн бэйэбит миэстэбитин сөпкө буларбытыгар, тугунан дьарыктанарбытыгар, туох идэни таларбытыгар биир сүрүн күүс буолар. Олоххо туттар сатабыллары, үөрүйэхтэри оскуола саҕаттан ылабыт.
Быйыл оскуолабыт агрооскуолалар республиканскай күрэхтэригэр «Лучшее учебно- производственное хозяйство образовательной организации РС (Я)» номинацияҕа III миэстэ буоллубут. Учууталларбыт үлэлэрэ сыаналаммытыттан үөрэбит уонна эҕэрдэлиибит.
Сайыына Неустроева, Абый оскуолатын «Точка Роста» гуманитарнай-цифровой киин корреспондена