Тохсунньу 25 күнүгэр Арассыыйаҕа устудьуон күнэ. История кэпсииринэн, 1755 сыллаахха бу күн ыраахтааҕы Елизавета Петровна ыйааҕынан, Москубаҕа университет арыллыбыт. Ол оруобуна Сибэтиэй Татьяна күнүгэр сөп түбэспит. Онон Татьяна күнэ Арассыыйаҕа Устудьуоннар күннэринэн биллэриллибит.
Оскуолабыт выпускниктара кыһыҥҥы сынньалаҥнарыгар дойдуларыгар күүлэйдии кэллэхтэринэ, хайаан да оскуолаларыгар кэлэн көрсөн, кэпсэтэн, улахан кылаас үөрэнээччилэригэр сүбэлээн баран үтүө үгэстээхтэр. Быйыл устудьуоннарга аналлаах «От сессии до сессии живут студенты весело» диэн бэрт сэргэх тэрээһин ыытылынна. Устудьуоннарга оскуола лидера Юра Слепцов соһуччу көрдөөх ыйытыылары биэрдэ, түргэнник хоруйдуулларыгар көрдөстө. Ыалдьыттар күлэ-үөрэ эппиэттээн, оскуолатааҕы мэник-тэник саастарын ахтан-санаан ыллылар.
Салгыы учууталбыт «Известные студенты» диэн Россия биллиилээх артыыстара, биэрии ыытааччылара туох идэлээхтэрин, үлэлээхтэрин туһунан кэпсээтэ. Холобур, аатырбыт телеведущай Ольга Бузова — географ, көрдөөҕү кэпсиир Гарик Мартиросян — быраас, Павел Воля — нуучча тылын учуутала, Михаил Галустян — фельдшер-акушер, аатырбыт Леонид Якубович — летчик буолалларын соһуйа иһиттибит.
Устудьуоннары кытта «Дай списать», «Общага», «Комендант» диэн сонун оонньууларга кытынныбыт.
Маннык профориентационнай көрсүһүүлэр улахан кылаастарга олус наадалаахтар. Араас элбэх идэни билэбит. Устудьуон олоҕун долгуйа күүтэбит.
Ника Дохунаева, Абый орто оскуолатын 8 кылааһын үөрэнээччитэ,
«Точка Роста» киин эдкора.