Сэтинньи 23 күнүгэр т.н.д. А.Е.Слепцов аатынан Абый орто оскуолатын үлэһиттэрэ ГТО нормативтарын туттаран, бэйэлэрин холонон көрдүлэр. Бу тэрээһин республикатааҕы профсоюз декадатын чэрчитинэн ыытылынна.
Бүтүн Россия үрдүнэн ГТО туттарыы сылтан сыл элбээн иһэр. Бу тэрээһин киһини эт-хаан өттүнэн сайыннарар, дьону сомоҕолуур уонна патриотическай санааны үөскэтэр, үрдэтэр. Билиҥҥи тыҥаан турар кэмҥэ маннык тэрээһиннэр буолаллара олус туһалаах.
Абый нэһилиэгэр үлэҕэ уонна дойдуну көмүскүүргэ бэлэмин 43 оскуола үлэһитэ бэрэбиэркэлэннэ. Биэс станцияны кэрийэ сылдьан араас көрүҥҥэ бэйэлэрин тургутан көрдүлэр. Манна баар: тардыныы, пресс хачайдааһын, уһуну ыстаныы, саанан сыал ытыы, имигэһи көрүү. Тэрээһин түмүгүнэн бастыҥнар билиннилэр. Ол курдук, тардыныыга эр дьон үксэ 10 тахсата оҥордо, пресс хачайдааһыҥҥа нуучча тылын, литературатын учуутала Яна Садовникова уонна аангылыйа тылын учуутала Мария Бальчинова мүнүүтэҕэ 39 оҥордулар, онтон уһуну ыстаныыга история учуутала Игорь Стручков уонна техническэй үлэһит Михаил Слепцов 2 миэтэрэттэн тахсаны ыстанан соһуттулар. Сыал ытыыга саамай элбэх баалы Анна Рязанская (детсад иитээччитэ) уонна Елизавета Слепцова (оскуола повара) ыллылар, ордук имигэс (26см түһэн) хореограф Татьяна Корякина ааттанна.
Учуутал Анастасия Афанасьева ГТО туттарыытын туһунан санаатын үллэстэр:
Бастатан туран, маннык тэрээһини иилээн-саҕалаан ыыппыт, тэрийбит физкультура учууталларыгар, оскуолабыт профсоюһун председателигэр, администрациятыгар махтанабын. Олус сэргэх, үчүгэй тэрээһин ааста. Иккиһинэн, тэрээһин ГТО халыыбынан барбыта эмиэ үчүгэй. Хас биирдии киһи бэйэтин сааһынан арахсан, нормативынан туттарарын биһирээтим. Холобур, мин олус үөрдүм, бэйэм сааспар эт-хаан өттүнэн эппиэттиир турукка сылдьарбыттан уонна “зачет” ылбыппыттан.
Ити курдук, үлэһиттэр олус көхтөөхтүк кытыннылар, астыннылар уонна бэйэлэрин кыахтарын биллилэр. Салҕыы ГТО туттарыан баҕалаах үксээтэ, киһи көҕүн көтөҕөр тэрээһин диэн элбэх кыттааччы бэлиэтээтэ. Кыттааччылар скуола профсоюһугар, администрациятыгар махтал тыллары эттилэр.
Айыына Черемкина, учуутал