Сочи куоракка буолбут Норуоттар икки ардыларынааҕы «Мир на ладони» куонкуруска Абый улууһун Майыар орто оскуолатын «Нечэ» ансаамбыла (сал.Соломова А.Р.) Саха сириттэн кыттыыны ылан кыайыылаах буоллулар! Ырыа күрэҕэр Лия Егоровна Слепцова, Раиса Николаевна Корякина уолунуун Дьулустуун «Прикладное искусство» бөлөххө Гран — При үрдүк аатын ыллылар. Сережа Степанов «Фольклор» бөлөҕөр 1 истиэпэннээх лауреат буолла!
Надежда Васильевна Сидорова хомуска «Сайын кэлиитэ» композицияны толорон «Инструментальное искусство» бөлөххө 1 истиэпэннээх лауреат буолбут. Кини санаатын үллэстэр: «Улахан куонкурус буолан долгутуулаах эбит. Россия араас муннуктарыттан элбэх кыттааччы кэлбит. Ордук үҥкүүлэрин сөбүлүү көрдүм. Элбэх кыттааччыны кытта билистибит. Ордук Татарстантан кэлбит Гульнаазтыын доҕордостубут. Үрдүк таһымнаах куонкурустарга кыттыы оҕону күүскэ сайыннарар. Салайааччыларбытыгар Альбина Романовнаҕа, Лия Егоровнаҕа уонна төрөппүттэр ааттарыттан Сочига баар Лариса Лукиничнаҕа махталбыт муҥура суох!»
Майыар орто оскуолата үтүө үгэстэрин ыһыктыбат, өссө да сайда, үрдүк чыпчааллары дабайа турар. Оҕолору, төрөппүттэри, салайааччылары ситиһиилэринэн өссө төгүл эҕэрдэлиибит!
Бэлэмнээтэ Эльдар Садовников