Самаан сайын сылаас, сырдык күннэрэ номнуо ааһан, оскуолаҕа барар, үөрэнэр, сайдар кэммит улам чугаһыыр. Дьыл биир саамай үтүө кэмин оҕо аймах араастык атаарда. Ким сынньанан, араас дойдуларга сылдьан, ким үлэлээн дохуот оҥостон, ким дьонун кытта оттоон, кыстыкка бэлэмнэнэн сайынын туһалаахтык аһарар. Оттон быйыл оскуоланы бүтэрбит оҕолорго туспа долгутуулаах кэм буолла. Кинилэр олохторугар биир саамай суолталаах кэмнэрин, анал үөрэххэ туттарсар эппиэтинэстээх күннэрин хайдах ааспыттарый?
От ыйыттан оҕолор сүүмэрдиир хамыыһыйаҕа дөкүмүөннэрин биэрбиттэрэ. Онтон атырдьах ыйыгар ханнык үөрэххэ киирбиттэрэ дьэ, билиннэ. Дүллүкү оскуолатын выпускниктарыттан 2 оҕо үрдүк үөрэххэ киирдилэр: Хотугулуу Илиҥҥи Федеральнай уонна Арктикатааҕы Судаарыстыбаннай университет. Онтон 10 оҕо орто үөрэххэ баҕалаах идэлэригэр туттарсан киирдилэр. Оҕолор биһигини кытта санааларын үллэһиннилэр, сэһэргэстилэр. Кинилэртэн ханнык эксээмэннэри туттарбыттарын, ханнык үөрэххэ киирбиттэрин, туох уустуктары көрсүбүттэрин, дөкүмүөннэрин хайдах туттарбыттарын, былааннаабыт үөрэххэ киирбиттэрин, суоҕун уонна эһиил оскуоланы бүтэрээччилэргэ тугу баҕаралларын ыйыталастыбыт.
Наиль Степанов:
— Профильнай математиканы — 70 б., нуучча тылын — 57 б., биологияны 65 баалга туттарбытым. Арктикатааҕы Судаарстыбаннай университекка дөкүмүөммүн биэрбитим. Бэтэринээр — оҕо эрдэхпиттэн баҕарар идэм. Дьиэ кыылларын көрөрбүн-харайарбын олус сөбүлүүбүн. Эһиил оскуоланы бүтэрээччилэр эксээмэннэргэ үчүгэйдик болҕойон бэлэмнэнэллэригэр баҕарабын.
Алексия Михайлова:
— Нуучча тылын, физиканы, профильнай математиканы талбытым. ХИФУ-га физика-техническай үнүстүүккэ «Медицинская физика» салааҕа киирдим. Дьиҥэр, мин тыл уруоктарыгар үчүгэйдик үөрэммитим. Нуучча тылын, литературатын олимпиадаларыгар ситиһиилээхтик кыттарым. Аан бастаан госуслуганан, онтон куоракка бэйэм бараммын ХИФУ кылаабынай корпуһугар дөкүмүөннэрбин биэрбитим. Эрдэттэн чуолкай быһаарыммакка сылдьыбытым, мэдиссиинэ уонна техническэйгэ өттүгэр баҕарар этим. Барытын холбооммун, баҕарар үөрэхпэр киирдим.
Оҕолор эрдэттэн ЕГЭ-ҕэ бэлэмнэниҥ, ханна үөрэниэххитин баҕараргытын эрдэ билэ, быһаарына сылдьыҥ, оччоҕуна эрэ барыта үчүгэйдик сатаныа диэн сүбэлиибин.
Сергей Иванов:
— Базовай предметтэри туттарбытым. ХИФУ иһинэн баар КИТ (Колледж инфраструктурных технологий) киирдим. Дөкүмүөммүн бэйэм илдьэн туттарбытым. Оҕолор, кыһаллан үөрэниҥ!
Виктория Тарасова:
— Сүрүн эксээмэннэри, математиканы уонна нуучча тылын туттарбытым. Аллараа Бэстээххэ Тимир суол техникумугар «Организация перевозок и управление на транспорте» идэҕэ киирдим.Туттарсарбар улахан туох да уустуктары көрсүбэтим. Ол эрэн долгуйуу баар этэ. Дөкүмүөммүн онлайн ыыппытым. Бэйэм сөбүлээн талбыт идэбэр киирдим. Ол эрэн, өссө мин бэйэм баҕарар үөрэхтэрим эмиэ бааллар этэ. Оскуоланы бутэрээччилэргэ эрдэттэн үчүгэйдик эксээмэннэргитигэр кыһаллан бэлэмнэнэргитигэр баҕарабын. Сүрүнэ — эксээмэҥҥэ долгуйуо суохха наада. Эрдэттэн ханнык үөрэххэ киириэххитин баҕараргытын быһаарынаргыт ордук. Аттестат сыанатын туһугар эрдэ кыһаллыҥ!
Уруйдаана Тарасова:
— Орто үөрэххэ туттарсыам диэн былааннанан, сүрүн предметтэри эрэ талбытым. Бүлүүтээҕи педагогическай кэллиэскэ «Адаптивная физическая культура» салааҕа туттарсан киирдим. Манна киирэр оҕолор ОФП (общефизическай подготовка) туттарбыппыт. Дөкүмүөннэрбин онлайн ыыппытым.Онон былааннаабыт үөрэхпэр киирдим диэххэ сөп. Эһиил оскуоланы бүтэрэр үөрэнээччилэргэ этиэм этэ эксээмэннэрин ситиһиилээхтик туттаран олох киэҥ аартыгар үктэнэллэригэр хайаан да интэриэһиргиир, сөбүлүүр идэлэригэр киириэхтэрин наада. Эрдэттэн былаан оҥостон, үчүгэйдик толкуйдаан, талан үөрэххэ туттарыстыннар диэн баҕа санаабын тиэрдэбин.
Василий Федоров:
— Математиканы уонна нуучча тылын туттарбытым. ХИФУ-га Инфраструктурнай технология кэллиэһигэр, орто үөрэххэ киирдим. Аттестатым баала намыһах буолан, ханнык үөрэххэ ылалларынан бэйэм баран докумуоммун туттартаабытым. Онон эһиилги выпускниктарга баҕарар идэҕитигэр туттарсар курдук аттестакка үчүгэйдик кыһаллан үлэлээҥ диэн сүбэлиибин.
Оҕолорго олох эппиэтинэстээх, киэҥ аартыгар үктэммиккитинэн эҕэрдэлиибит, үөрэххитин ситиһиилээхтик бүтэрэн, төрөөбүт дойдубут сайдарын туһугар туһалаах дьон буолуҥ диэн баҕарабыт.
Алина Санникова, X кылаас,
Дүллүкү, Үөһээ Бүлүү, «Эрчим» медиакиин