Бу саас биһиги дьиэ кэргэммитигэр биир умнуллубат түгэнинэн «Спид Стар» сүүрүк ат туһунан киинэ тахсыбыта буолар. Мин аҕам Ядреев Сергей Петрович сүүрүк боруода аттар тренердэрэ буолар. Бу киинэҕэ кини оруолун Саха тыйаатырын артыыһа, К.С. Станиславскай аатынан РСФСР судаарыстыбаннай бириэмийэтин лауреата Иннокентий Луковцев оонньуур.
Аҕам «Сахаплемобъединение» диэн тэрилтэҕэ үлэлии сылдьан, директорын Степан Степанович Охлопковы кытта Ил Дархан бирииһигэр сүүрэр аты аҕалыахха диэн сүбэлэспиттэр. Күһүн 2009 cыллаахха Москва куоракка тиийэр. Ипподромҥа тиийэн атыыланар аттары көрө сылдьан, 3 саастаах Спид Стары сөбүлүү көрбүт. Төрдүн — ийэтин, аҕатын ситиһиилэрин таба көрөн, үөрэтэн баран талан ылбыт. Ити бириэмэҕэ эмиэ биир биллэр тренер Василий Игнатьев Европаттан ат аҕалан иhэр эбит. Кинини кытта Москваҕа көрсөн, ат тиэйэр массыына атыылаһан онно кыттыһан, этэҥҥэ айаннаан балаҕан ыйыгар кэлэллэр. Айантан сылайбыт быстыбыт Спид Стары кэлбитин кэннэ, Юрий Титов диэн кырдьаҕас ат билгэһитэ үчүгэйдик сыныйан, тутан-хабан көрөн баран, конюшняттан тахсан иһэн аҕабын ойоҕоско анньан баран: «Дьэ ноо, эрэйгин тиллиннэрэр ат кэлбит ээ» — диэбит. Онтон дьэ, Спид Стар дьарыгын саҕалаан барбыт. Үчүгэй дьарык кэнниттэн маанылаан дьаабылыка, саахар, моркуоп биэрэллэр эбит. Аҕам жокейдары толкуйдаан баран, Егор Оконешниковы ыҥырбытыгар сөбүлэһэн, бииргэ үлэлээн барбыттар. Кыһын наһаа үчүгэйдик үлэлээн, кыстаан бараннар сайын 2010 сыллахха Ил Дархан бирииһигэр кыайыы бастакы өрөгөйүн ылаллар. Спид Старга анаан тэрилтэлэрин дириэктэрэ улахан сэргэ туруортарар. Ол сэргэлэригэр алгыс этэн, кыл баайан аттарын арчылаабыттар. Хас күрэхтэһии иннинэ онно баайан туруоран, Үөһээ Айыылартан көрдөһөн баран бараллар эбит. Баҕар, ол сэргэ кини инники кыайыыларыгар, күүстээх дьылҕатыгар күүс-көмө буолбута буолуо. Ол курдук, 2011, 2012 сылларга эрэллээхтик иннин кимиэхэ да биэрбэтэҕэ.
Спид Стар баар буолан Саха сиригэр ат спордун дьиҥнээхтии бигэргэтэн көрдөрөөрү, түөрт сыл тухары киинэни оҥорон таһаардылар. Ити киинэ бастаан уһулларыгар мин массовкаҕа трибунаҕа ыалдьааччы быһыытынан уһуллубутум. Аан бастакынан киинэ сүрэхтэниитигэр биһи дьиэ кэргэнинэн баран көрбүппүт. Киинэни олус сөбүлээтибит, долгуйдубут, бэйэбитигэр чугастык ылынныбыт.
Артем ЯДРЕЕВ,
VII «Б» кылаас,
Дьокуускай куорат 17 №-дээх орто оскуолата