Таатта улууһун Уус Амма тыа сирин түөлбэтин баһылыгын солбуйааччытын Гаврил Анатольевич Нестеревы кытта 2025 сыл түмүгүн, үүммүт 2026 сыл былааннарын туһунан кэпсэттибит.
Быйыл Ытык Тааттабыт түөлбэтигэр ыытыллыбыт ХХII Манчаары оонньуулара үрдүк таһымнаахтык ыытылларыгар бэйэбит кыахпытынан күүс-көмө буолан, бары бэриллибит сорудахтары толордубут.
Хадаайыга сыһыарыллыбыт Чурапчы делегациятын үрдүк таһымнаахтык көрсөрбүтүгэр бары бүттүүн турунан, аһылыгын тэрийэн ыалдьыттарбыт махталларын ылбыппыт. Бу улахан таһымнаах оонньууга кыра нэһилиэктэн 5 олохтоох дьоммут кыттыбыта улахан ситиһии буолар. Үрдүк көрдөрүүлэнэн, Чымынаайыбытын дорҕоонноохтук ааттаппыттарынан киэн туттабыт. Үс киһибит спорт маастара үрдүк ааты ыллылар: Э.А. Куприянов — сыал ытыытыгар, М.А. Васильева — ох саанан ытыыга, Г.А. Варламова — мас тардыһыыга.
Ааспыт сыл бары култуурунай, спортивнай тэрээһиннэрэ Улуу Кыайыы 80 сылыгар ананан ыытылыннылар. Онно барытыгар бэйэбит кыахпытынан ситиһиилээхтик кытынныбыт. Ол курдук, комплекснай спартакиадаҕа Дьүлэй, Уолба нэһилиэктэрин кэнниттэн бочуоттаах үһүс миэстэни ылары ситиһэн, 50 тыһыынчалаах сертификатынан наҕараадаланныбыт. Нэһилиэкпитигэр хапсаҕайдаһан тустууга Федерация Кубогын үрдүк таһымнаахтык ыыппыппыт.
Үүммүт 2026 сыл Россияҕа Норуоттар сомоҕолоһууларын, Саха өрөспүүбүлүкэтигэр Култуура, Тааттабыт улууһугар Айар Ситим сылынан биллэрилиннэ. Биһиги Чымынаайыбытыгар дьиэ-кэргэн экономиятын сайыннарыы сылынан биллэрдибит, о.э. хас биирдии ыал баар кыахтары табатык туһанан, кэминэн да буоллун, үлэ эбии тэринэн үлэлииллэригэр сүбэ-саргы буоламмыт туох кыалларынан күүс-көмө буолуохтаахпыт.
Кэлбит 2026 сылга сүрүн соруктарбытынан оскуола-уһуйаан бырайыага госэкпертизаны ааһан, тутуутун бырагыраамаҕа киллэлэргэ үлэ ыытыыта, бөһүөлэк илин өттүгэр оҥоһуллубут бырайыагы олоххо киллэрии, интэриниэт ситимин тардыы үлэтин ыытыы буолар, ону кытта элбэх граннарга кыттан, нэһилиэкпит сайдарын туһугар элбэх үлэ ыытыллыаҕа диэн эрэнэбит.
Саргылаана Нестерева, Г.Д.Бястинов-Бэс Дьарааһын аатынан Чымынаайы орто оскуолатын юнкора, Таатта улууһа.
keskil14.ru