Олунньу 24-25 күннэригэр Уус Алдан улууһун нэһилиэктэринэн кэрийэ сылдьан СӨ Бырабыыталыстыбатын отчуота түмүктэннэ. Ол курдук, Лөгөй нэһилиэгин киин бөһүөлэгэр Кэптэнигэ П.П Оҕотоойоп аатынан сынньалаҥ киинигэр олунньу 24 күнүгэр буолан ааста.
Отчуокка СӨ салалтатын уонна араас министиэристибэлэрин бэрэстэбиитэллэрэ кыттыыны ыллылар:
• Алексеев Василий Петрович – МР «Уус-Алдан улууһа (оройуона)» баһылыга, бөлөх салайааччыта.
• Турантаева Мария Васильевна – Саха Өрөспүүбүлүкэтин култуураҕа уонна духуобунай сайдыыга миниистирин бастакы солбуйааччыта.
• Павлов Никита Александрович – Саха Өрөспүүбүлүкэтин олохтоохторун гражданскай оборонаҕа уонна олох-дьаһах куттала суох буолуутун хааччыйыыга миниистир солбуйааччыта.
• Захаров Сергей Сергеевич – Саха Өрөспүүбүлүкэтин Тыа хаһаайыстыбатын уонна аc-үөл бэлиитикэтин министиэристибэтин сүөһү иитиитин, кээпэрээссийэлэһии уонна хаһаайыстыба дьоҕус көрүҥнэрин сайыннарар департамент салайааччытын солбуйааччыта.
• Сивцев Петр Николаевич – Саха Өрөспүүбүлүкэтин физическэй култуура уонна маассабай спорт управлениетын салайааччытын солбуйааччыта.
Уопсайа мунньаҕы 60-тахса олохтоох көрдө иһиттэ, маны тэҥэ үгүс дьону долгутар тыын кыһалҕалардаах ыйытыылары биэрдилэр.
Хомустаах бөһүөлэгэр 1958 сыллаахха тутуллубут кулууп дьиэтэ эргэрэн аварийнай туруктааҕын, ону сэргэ исписэлиистэр олорор уопсай дьиэлэрэ өрөмүөҥҥэ наадыйарын этэн туран, саҥа кулууп дьиэтин туруорустулар.
Лөгөй нэһилиэгэр оттук мас чугаһынан суоҕунан, чох сыаната ыараабытынан олохтоохтор чааһынай дьиэлэри ититии ситимигэр киллэриини күүскэ туруорустулар. 2028 сылга Иван Яковлевич Александров — Күүстээх Уйбаан төрөөбүтэ 150 сыла туоларынан, олорон ааспыт дьиэтин сөргүтүү үлэтэ наадатын эттилэр.
Кэптэни бөһүөлэгин олохтоохторун биир сүрүн кыһалҕалаах боппуруоһунан турар оҕо уһуйаана. Биһиги бөһүөлэкпитигэр саҥа оҕо уһуйаана тутуллуохтааҕын үп тиийбэтинэн проега тохтоон турар, ол эрэн олохтоохтор эргэ уһуйаан дьиэтин хаарбах туруктааҕын хапытаалынай үлэ барыахтааҕын туруорустулар.
Маны тэҥэ 2011 сыллаахха култуура дьиэтэ олоххо киирбитэ ол эрэн билииҥи туругунан акылаата хамсаан хаарбах туруктаах турарын, хапытаалынай өрөмүөн ыытыллыан наадатын туруорсаллар. Итиэннэ СӨ култуураҕа уонна духуобунай сайдыыга миниистирин солбуйааччы Мария Турантаева кыра бөһүөлэктэргэ тэттик кыра кулууптары тутуу улуус уонна нэһилиэк бэйэлэрин күүстэринэн анал бырайыактарга, программаларга киирсэн туттуохтарын сөбүн, култуура кииннэрэ тутуллар түгэннэригэр бастатан туран улахан бөһүөлэктэргэ тутулларын эттэ, итиэннэ Пушкинскай картаны тыа сиригэр туттуу ситэтэ суоҕун ыйан туран, оҕо сайдарыгар судаарыстыбаттан түһэр көмө харчыны олохтоох култуура тэрээһиннэригэр туттан, эбии дохуот киллэриниэхтэрин наадатын эттэ.
Маны тэҥэ Кэптэни 2015 сыллаахтан спорт саалата суох олоробут. Саҥа спорт саалатын проега 2025 сыл сэтинньи ыйыгар экспертизаны ааспыта, аны мантан иннэ үп көрүлүннэҕинэ саҥа спорт саалабытын долгуйа күүтэбит.
Маннык бырабыыталыстыба тыа сирин олохтоохторун кытары көрсүһэрэ, хас биирдии олохтооххо инникигэ бигэ эрэллээх буолууну түстүүр.
Янис СЫСОЛЯТИН, Лөгөй лиссиэй-интэринээтин «LegMedia» киин юнкора