Саллааттар уонна мотуруостар төрөппүттэрин кэмитиэтин салайар Мария Егоровна Емельянованы Саха сиригэр билбэт киһи суоҕа буолуо. Кини Чечня сэриитин кэмиттэн саҕалаан саллааттар ийэлэригэр көмө-тирэх буолар. Онтон 2008 сылтан кэмитиэт бэрэссэдээтэлинэн талыллан уопсатыбаннай дьыаланан бэйэтин ис кыаҕын ууран туран, ийэлии ис сүрэҕиттэн кыһаллан туран үлэлиир.
Бу билигин эмиэ Мария Егоровна Уһук Илиҥҥи эрэгийиэҥҥэ турар байыаннай чаас саллааттарын кытары көрсө сылдьар. Билигин кини Уссурийскайга баар. Хабаровскай куорат аттынааҕы Саха сириттэн элбэх саллаат сулууспалыыр чаастарыгар саха норуотун үгэһинэн Ыһыах тэрийдэ. Уолаттар бары да санаалара көтөҕүлүннэ, астыннылар, саха ырыата ылланна, тойуга, оһуохайа дьиэрэйдэ, саха саҥата сатараата. Бу буоллаҕа — ыраах төрөөбүт дойдуттан тэлэһийэ сылдьар, Ийэ дойдуга ытык иэстэрин толоро сылдьар биһиги эдэркээн уолаттарбытыгар, эр хоһууннарбытыгар бастыҥ өйөбүл, сэниэ, күүс-уох. Князеволконскайга, Млечниккэ, Бикиҥҥэ, Сергеевкаҕа сулууспаны ааһар, уопсайа алта байыаннай чаастан мустан, төрөөбүт дойду салгынын, Ыһыах тыынын иҥэриннилэр. Бу тэрээһиннэргэ кыттыыны РФ үтүөлээх артыыһа, СӨ норуодунай артыыһа Дмитрий Артемьев, СӨ үтүөлээх бырааһа Мария Башинова ыллылар. Маны таһынан хас биирдии чааска бэсиэдэлэр, көрсүһүүлэр ыытылыннылар, тустаах кэпсэтии барда.
— Ыытыллар үбүлүөйдээх тэрээһиннэр былаан быһыытынан Саха АССР 100 сылыгар, Саха сиригэр Ийэ сылыгар ананаллар. Сааскы аармыйаҕа призыв буола турар. Бэҕэһээ эрэ бастакы призыв уолаттарын чааска көрсүбүппүт. Оҕолор санаалара бөҕөх.
Хаартыскаҕа: Призыв-2022
Онтон сулууспалыы сылдьааччылар бары этэҥҥэлэр, бары төлөннөөх эҕэрдэлэрин тиэрдэллэр.
Уол оҕону аармыйаҕа сыһыарыы төрөппүт-оскуола-байыаннай хайысхалаах кулууптар ситимнээх үлэлэрин кытары быһаччы сибээстээх. Дойдуга бэриниилээх буолуу — бу оҕону кыра сааһыттан төрөөбүт дойдуга тапталга, убаастабылга иитии төрүөтэ буолар, — диир Мария Емельянова.
Маны таһынан Мария Егоровна СӨ Ил Дарханыгар А.С. Николаевка Украинаҕа спецоперацияҕа суорума суолламмыт саллааттар ааттара төрөөбүт дойдуларыгар, үөрэммит оскуолаларыгар үйэтитиитигэр үлэ барыаҕын туруорсар. — Үрдүкү салалта, муниципальнай тэриллиилэр өйүөхтэрэ диэн бигэ эрэллээхпин, — диир саллааттар уонна мотуруостар төрөппүттэрин кэмитиэтин салайааччыта.
Саха сириттэн сулууспаҕа ытык иэстэрин толоро сылдьар эр хоһууттарбытыгар тулууру, кыаҕы, кытаанах доруобуйаны баҕара хаалабыт. Этэҥҥэ сулууспаҕыт ааһан, төрөөбүт дойдугутугар эргиллэн кэлээриҥ диэн алгыы хаалабыт.
Саллааттар эҕэрдэлэрин видеоҕа көрүҥ:
Бэлэмнээтэ Анна СЛЕПЦОВА.