Муома улууһугар Улахан Чыыстайга «Магир» тыа хаһаайыстыбатын дьиэ кэргэнинэн көһө сылдьар община ыстаадатын иһинэн үлэлиир «Оралчимна» лааҕырга бу күннэргэ үөрүүлээх сонун. Лааҕыр иитиллээччитэ Анатолий Голиков аармыйаттан ытык иэһин толорон кэллэ. Толя бөһүөлэккэ кэлээт, тута ыстаадаҕа айаннаабыт. Сол курдук айылҕатын, табаларын ахтыбыт…
— Мин Приморскай кыраайга Уссурийскай куоракка мотострелковай войскаҕа сулууспалаабытым. Аармыйаҕа былырыын 2021 с. от ыйыгар ыҥырыллан барбытым. Маҥнай утаа эдэр байыас куурсун ааспытым. Маны ааһан баран подразделениеларынан ыыппыттара. Сүрэхтэниини ааһан баран, дьэ, дьиҥнээх сулууспа саҕаланар. Биһиги техникалары өрөмүөннүүр этибит. Аармыйа иннинэ Намнааҕы автомеханиктар техникумнарыгар үөрэммит буолан, техника өттүгэр сыстаҕаспын, онон билэбин.
Олунньу ыйтан Украинаҕа байыаннай спецоперация буолбутугар, техникалары өрөмүөннээн онно ыытарбыт. Үс поеһынан таһаарарбыт. Бу ыам ыйыгар эмиэ ыыппыппыт.
Аармыйаҕа сылдьан төрөөбүт дойдубун, дьоммун-сэргэбин ахтар аҕай этим. Кыра эрдэхпиттэн таба ыстаадатыгар сылдьыбыт буолан, табаларбын ордук саныыр этим. Куруутун соруһа, ыйыта сылдьааччым.
От ыйын 11 күнүгэр увольненияҕа барбытым. Онтон төрөөбүт бөһүөлэкпэр аҕыйах хоноот, ыстаадаҕа барбытым. Билигин ыстаадаҕа баарбын, дууһалыын сынньана сылдьабын.
Ыччаттарга олох оскуолатын — аармыйаны этэҥҥэ ааһалларыгар, ытык иэс баарын туһунан өйдүүллэригэр, онтон сулууспалыы сылдьааччыларга этэҥҥэ буолууну, дойдугут сылаас тыына куруутун арыаллаан көмө-тирэх, өйөбүл буоларыгар баҕарабын.
Кэпсэттэ Анна СЛЕПЦОВА.