Уйбаан Ороһуунускай аатынан Ороһу нэһилиэгин модельнай библиотеката «Саҥа ааҕааччы» диэн бырайыагынан 2022 сылтан үлэлээн саҕалаата. Бырайыак сааһыттан тутулуга суох, саҥа кэм дьонун ирдэбилинэн ааҕааччыга утары баран, кини сайдар хайсхатын тобулан үлэлиир.
Ол курдук, быйыл «Читаем все» өрөспүүбүлүкэтээҕи бырайыакка уонна Ааҕыы сылыгар олоҕуран, Ийэ сылын чэрчитинэн «Книжное приданое» диэн Ороһубут нэһилиэгэр быйыл күн сирин көрбүт кырачааннарга бэлэх ууннубут. Бэлэх Петр Николаевич Тобуруокап «Саҥарар азбука» кинигэтиттэн, аҕыйах ыйдаах оҕо өйүн-санаатын сайыннарар хараҥа-маҥан өҥнөөх хартыыҥкаларыттан уонна эҕэрдэ открыткаттан турар.
Ыам ыйын 27 күнүгэр, Библиотека күнүн көрсө, «Библионочь» акцияҕа икки кырачааҥҥа туттарбыппыт, билигин бу саҥа дьыл иннинэ өссө сэттэ дьиэ кэргэҥҥэ бэлэх ууннубут. Бу акция сыала-соруга кырачааннар кыра эрдэхтэриттэн информацияны ылыналлара судургу буоллун, төрөппүт оҕо ааҕыытыгар болҕомтону уурдун диэн тэриллэр.
Улахан махталбытын тиэрдэбит СӨ норуодунай суруйааччытыгар Дмитрий Федосеевич Наумовка, кини биһиэхэ «Саҥарар азбука» кинигэни биир дьааһыгы өйөөбүтэ, «Тугутчаан» оҕону сайыннарар киин кэлэктиибигэр, чуолаан Саргылаана Тимофеевнаҕа.
Бу акция сылын аайы үтүө үгэскэ кубулуйан, кырачаан ааҕааччыларбыт элбии туралларыгар эрэнэбит.
Жанна Иванова, Уйбаан Ороһуунускай аатынан олохтоох библиотека сэбиэдиссэйэ.