Тимофей Сметанин “Сиэм диэбитэ – хата бэйэтэ сиэтилиннэ” кэпсээнин аахпыт 2 Малдьаҕар орто оскуолатын үөрэнээччилэрэ санааларын үллэстэллэр.
Сивцев Ярик, 4 кылаас үөрэнээччитэ: “Мэхээлэчээн булчут өйүнэн бөрөнү кыайан тыыннаах хаалбыт. Бөрө тайахтары тута барбытыгар быата сулбуруйан хаалбыт уонна бөрө хабарҕатыгар хаайтарбыт. Уол ону көрөн баран, быатын эрийэн, бөрөтө сатаан айаҕын аппат буолбут. Бөрө ыстан да ыстан, ойуоккалаа да ойуоккалаа буоларын иһин, булчут уол кыра быһаҕын ылан, талахтан мас быһан, быһах курдук оҥорон, бөрө көхсүтүгэр иилбит. Ыстаннаҕына ол талах оҥоһук көхсүтүн анньар эбит. Мэхээлэчээн уолуйбакка, ыксаллаах түгэҥҥэ сөпкө дьаһаммыт дии санаатым”.
Гаврильева Эльмира, 4 кылаас үөрэнээччитэ: “Мин санаабар, бу дьиҥнээх түбэлтэ буолбут. Кырачаан уол төһө да куттаммытын иһин, ону барытын умнан, бөрөнү кыайбыт. Бу уолга быһаҕа уонна талах оҥоһуга көмөлөстө”.
Артем Иванов, 3 кылаас үөрэнээччитэ: “Мин аҕам уонна эһэм иккиэн булчуттар. Мин аҕабын кытта алааска барса сылдьыбытым. Онно кини ойууру алаадьынан аһаппыта. Үс алаадьы уурбуппут. Барыта үчүгэй буоллун диэн уурбута. Булчут киһи туохтан даҕаны куттаммат, ойуурга муммат, муннаҕына да компаһынан көрөр, костеру оттон, ас астаныа этэ. Уонна айылҕаны киртиппэт дьоннор – ол дьиҥнээх булчуттар. Улааттахпына булчут буолуом”.
Денис Пудов, 3 кылаас үөрэнээччитэ: “Бу кэпсээн уолаттары өйдөөх буолуҥ диэн үөрэтэр. Мин аҕабын уонна убайбын кытта балыктыы барса сылдьыбытым. Убайым Федя сордоҥ хаптарбыта. Мин суох. Биир балыгы чуут хаптара сыспытым да, куотан хаалбыта. Балыксыт өр кэтэһэн олорору сатыахтаах диэн онно билбитим”.
“Эһэни миинэн турардаахпын” кэпсээн туһунан 3 кылаас уолаттара маннык кэпсииллэр: “Сүгэнэн эһэни өлөрбүт булчут күүстээх. Булчут атын эһэ сиэбит, ол иһин эһэни кини өлөрөр. Биһиги 3 кылааспыт эрээри сорохторбут кустаһа сылдьыбыппыт. Булчут күүстээх буолуохтаах, саалаах, хорсун, үчүгэй доруобуйалаах, үчүгэй настарыанньалаах, үчүгэйдик аһыахтаах, ханна сылдьарын билиэхтээх, бэргэн ытааччы, хаһан ытарын билиэхтээх, болҕомтолоох буолуохтаах уонна мэлдьи саппаас ботуруоннаах, пластмасс кустардаах, чуумпутук сылдьар, кус ыҥырардаах, хараҥаҕа үчүгэйдик көрөр, үчүгэй массыыналаах буолуохтаах”, — диэн бу кэпсээни ааҕан баран уолаттар бары булт туһунан санааларын үллэһиннилэр.
“УОТ” медиакиин