Быйылгы үөрэх дьыла миэхэ элбэх умнуллубат үтүө түгэннэрдээх буолла. Олортон биирдэстэринэн сааскы сынньалаҥ кэмигэр кулун тутар 22-24 күннэригэр Хаҥалас улууһугар Покровскайдааҕы колледжка бииргэ үөрэнэр дьүөгэбиниин Басова Кариналыын “Эдэр профессионаллар” региональнай чемпионаттарыгар “Туризм” компетенцияҕа кыттан кэлиибит буолар. Тиийээт да регистрацияны ааспыппыт, барыта Бүлүү, Горнай, Нам, Мэҥэ Хаҥалас, Ньурба, Хаҥалас, Амма, Уус Алдан, Үөһээ Бүлүү, Чурапчы улуустарыттан уонна Дьокуускай куораттаникки бөлөҕүнэн арахсан сүүрбэттэн тахса оҕо кытынна.
Компетенциябыт олус интэриэһинэй, элбэх саҥаны биллибит, опытырдыбыт. Туристары кытта үлэҕэ, маршрут, бизнес былаан оҥоруутугар, тур тэрийиигэ уо.д.а үс модульунан икки күн устата үлэлээтибит. Тугу оҥорбуппутун барытын кэпсээн истибит. Ордук таһаарыылаахтык “Сахабыт Республикатыгар заповедникка туристары сырытыннарыы үлэтин сайыннарыы” модульга үлэлээтибит дии санаатыбыт. Бу иннинэ дойдубутугар Ытык Күөлгэ улуустааҕы чемпионакка кыттан бастаабыт буолан, бэйэбитигэр эрэллээхтик кытынныбыт. Түмүгэр Хаҥалас, Горнай, Үөһээ Бүлүү, Нам хамаандалара бириистээх миэстэҕэ таҕыстылар.
Инники сылларга кыттыбыт опыттаах оҕолор кыайаллар эбит диэнтэн уонна эһиил эмиэ кыттар санааланныбыт. Салайааччыбыт Розалия Васильевна Баишева чемпионатка кыттарбытыгар олус үчүгэйдик бэлэмнээн илдьэ сырытта, аймахтарыгар хоннорон, бэлэм дьиэтээҕи минньигэс аһылыгы аһыы сырыттыбыт.
Чемпионаппыт кэннэ Дьокуускайга күүлэйдээтибит, 202 микрорайоҥҥа тутуллубут муус пааркаҕа, батутнай кииҥҥэ оонньоотубут. Маннык сонун, умнуллубат үтүө тэрээһиҥҥэ кыттыбыппытыгар, элбэх сонуну көрбүппүтүгэр төрөппүттэрбитигэр, учууталларбытыгар махтанабыт.
Ангелина Данилова, IX кылаас,
Уолба орто оскуолата, Таатта