Бүгүн, сэтинньи 11 күнүгэр, Былатыан Ойуунускай төрөөбүт күнүгэр анаан А.Г уонна Н.К. Чиряевтар ааттарынан Дьокуускай куорат национальнай гимназиятыгар «Сыахай уһуйаана. Оҕо ыһыаҕа» диэн ураты кистэлэҥнээх дьарык хоһо арылынна. Ол туһунан национальнай гимназия Инстаграм сирэйигэр иһитиннэрэр.
Бу күн үөрэх кыһатыгар Былатыан Ойуунускай оҕо сааһыгар элбэхтик сыахайынан оонньоон кэлбитин уонна сурукка-бичиккэ суруйан бэлиэтээн хаалларбыт улуу убайбыт эппитин бэлиэтээтилэр. Сыахай дьарыга олус дириҥ иитэр ис хоһоонноох. Ол курдук оҕо илиинэн үлэлиир сатабыла сайдар, оонньуур сирэйин омоонун, илиитин-атаҕын мэһийэн оҥорор уонна силигин ситэрэн таҥыннарар уо.д.а. элбэх сыралаах үлэттэн сыахай дьүһүнүн биэрэр. Оҕо сыахайынан оонньуу олорон дьиэ кэргэн барылын таһааран оонньуур, ол курдук инникитин дьиэ кэргэннээх, элбэх доҕоттордоох, таптыыр үлэлээх дьоһуннаах киһи буола улаатар.
Ити курдук национальнай гимназияҕа Саха сирин автономията 100 сылын көрсө бэлэмнэнии үлэтэ саҕаланна. Ол курдук, «Оҕо ыһыаҕа» бырайыакка «оҕо- төрөппүт-кэлэктиип» буолан быыстапка туруоран көрдөрөр былааннаах.
Уһуйаан салайааччыта — Айталина Иванова, Саха сирин кукольниктарын чилиэнэ.