Балаҕан ыйын 29 күнүгэр Болугур орто оскуолатыгар «Гольдеровтар көмүс күһүннэрэ» диэн сүрдээх интэриэһинэй тэрээһин буолла. Элбэх оскуолаттан оҕолор кытыннылар, ол иһигэр, биһиги, Амма Наахара орто оскуолатын үөрэнээччилэрэ эмиэ сырыттыбыт. Бу тэрээһиҥҥэ Василий Гольдеров, кини кыыһа Саргы Куо уонна Михаил Дьячковскай-Көлбө айымньыларыттан хоһоон ааҕылынна, ырыа ылланна, квест-оонньуу, «Мин кусчуппун, мин булчуппун» диэн спортивнай күрэх буолла.
Маннык тэрээһиннэргэ оҕо сайдар, кэрэҕэ тардыһар, элбэххэ үөрэнэр.
Мин хоһоон ааҕыытыгар 2 миэстэни ылан олус үөрдүм, элбэх оҕолору кытта билсистим.
Өссө Саргы Куо, Любовь Горохова-Сүүмэх суруйааччылары көрөн үөрдүбүт, хаартыскаҕа түстүбүт. Амма Наахара оскуолатыттан 7 оҕо кытынна. Үөрэн-көтөн, элбэҕи билэн тарҕастыбыт.
Бу тэрээһиһи Болугур оскуолатын учууталлара олус үчүгэйдик тэрийэн ыыттылар. Кинилэргэ улахан махталбын тириэрдэбин!
Күндүүнэ Степанова, VIII кылаас,
«Аартык» медиа-киин,
П. И. Яковлев аатынан Амма Наахара орто оскуолата
Амма