Аҕам саастаах дьоҥҥо аналлаах декада чэрчитинэн, Танара орто оскуолатыгар алтынньы 9 күнүгэр «Аһаҕас аан» күнэ бэрт сэргэхтик буолан ааста.
Кэлбит ыалдьыттарбытыгар оҕолор оскуолаларын устуоруйатын сырдаттылар, «Точка роста» кииҥҥэ маастар-кылаастары ыыттылар, бэйэлэрэ таҥан таһаарбыт массыыналарын сүүрдэн көрдөрдүлэр, анал ачыкылары кэтэрдэн аатырбыт «Луврга» күүлэйдэттилэр, «3Д принтер» кыаҕын кэпсээтилэр. «Бэдэр» байыаннай уонна дойдуга бэриниилээх буолуу кулууп иитиллээччилэрэ автоматы ыһан-таҥан көрдөрдүлэр, кэпсээтилэр.
Оскуола дириэктэрэ Е.П.Эверстов ыалдьыттарга экскурсия ыытта, сырдык саҥа аһыыр сиргэ итии үүттээх чэйинэн күндүлээтэ.
Бу күннэргэ үтүө үгэс быһыытынан, оскуола бары үлэһиттэрэ, учууталлар, үөрэнээччилэр анаммыт аҕам саастаах дьонноругар, нэһилиэк тэрилтэлэригэр үлэлээбит бэтэрээннэргэ, аҕам саастаах коллегаларыгар, өр сылларга үлэлээбит бэтэрээн учууталларга бэйэлэрин сэмэй бэлэхтэрин туттардылар.
«Аһаҕас аан» күнэ истиҥ долгуҥҥа ыытыллан, кэлбит ыалдьыттар дуоһуйан, астынан, сэргэхсийэн, алгыстарын этэн тарҕастылар. Тус бэйэбит ытыктыыр дьоммутугар маннык хабааннаах тэрээһиннэри ыытарбытыттан, үөрдэ сылдьарбытыттан олуһун диэн астынныбыт.
«Бэдэр» байыаннай уонна дойдуга бэриниилээх буолуу кулууп, салайааччы В.Н.Николаева