Биһиги, 5 кылаас кэлэктиибэ, алтынньы ый 11 күнүгэр Аҕам саастаах дьон декадатыгар аналлаах «День добра и уважения» кылаас чааһыгар Анна Алексеевна, Василий Васильевич Тарабукиннар дьиэлэригэр тиийэн, бэйэбит оҥорбут открыткабытын туттардыбыт, монтаж-хоһоон аахтыбыт. Педагогическай үлэ бэтэрээнэ Анна Алексеевна түөрт уонча сыл Уус Таатта орто оскуолатыгар учууталлаабыт, элбэх оҕону үөрэппит эбит. Кини курдук математика учуутала буолбут оҕолорун туһунан киэн тутта кэпсээтэ. Онтон үлэ бэтэрээнэ Василий Васильевич урукку совхоз үлэтин, билиҥҥи бириэмэҕэ сылгыны иитии туһатын, үчүгэйин кэпсээтэ. Бииргэ үөрэнэр табаарыспыт Сандал Тарабукин эбэлээх эһэтэ биһиэхэ бэрээдэктээх буолан, үөрэххэ кыһаныахтаахпытын, үчүгэй дьон буола улаатан тахсарбытыгар баҕа санааларын эттилэр, кэлэр саас, сайын сылгы иитэр сайылыктарыгар ыалдьыттата ыҥырдылар, минньигэһинэн күндүлээтилэр. Ити курдук, элбэх интэриэһинэйи эбии билэн, үөрэ-көтө тарҕастыбыт, кинилэргэ үтүөнү, доруобуйаны баҕардыбыт.
Алекса Лебедева, Ляна Неустроева,
V кылаас, Н.Д.Неустроев аатынан Уус Таатта орто оскуолата, Таатта