Ханнык баҕарар омук үтүө өйүн-санаатын, культуратын, үгэстэрин, материальнай баайын биһигэ – дьиэ кэргэн уонна инники кэскиллэрэ – ыччаттара буолар. Дьиэ кэргэн – оҕону иитии саамай саҕаланар сирэ, онтон дьоҕурдаах ыччат элбиирэ омук сайдыыта. Бу барыта биир ситимнээх, сайдыылаах буоларын туһугар оскуола күнүн ахсын тирэх буолар.
Ааспыт сыл атырдьах ыйын 4 к. 479 N-дээх сокуоҥҥа олоҕуран, 2023 сыл балаҕан ыйын 1 күнүттэн Россия хас биирдии оскуолатыгар оҕону үлэнэн иитии ирдэбилгэ киирдэ. Бу ирдэбил сүрүнэ – оҕону үлэ үөрүйэхтэригэр, сатабылга, тус бэйэ кыаҕын оруннуурга, дьоҕурун сайыннарар, үөрэтэр аналлаах.
Саха сирин оскуолалара, чуолаан агро-оскуолалар бииргэ төрөппүтү, оҕону кытта ыкса үлэнэн иитиигэ күүскэ үлэлэһэллэр. Оҕо оскуолаҕа ылыммыт дьоҕура иҥэн, дьиэ кэргэнигэр олохсуйар, эбии күүс буолар. Араас хайысхалаах лааҕырдар, куруһуоктар, бырайыактар арыллан үлэлииллэр. Эппиппит курдук, оҕо бэйэтин сатабылын, дьоҕурун сайыннарар. Ол иһин, бу мунньахха мустубут кэлбит СӨ үөрэҕин үлэһиттэрэ сайыҥҥы кэмҥэ оҕолору үлэҕэ сыһыарар туһугар сайылыктары, лааҕырдары тэрийиэҕиҥ уонна бастыҥ үлэлээх оскуолалар үлэлэрин уопутун тарҕатыаҕыҥ диэн этиилэри киллэрдилэр.
Тохсунньу 24 күнүгэр СӨ үөрэҕин үлэһиттэрин тохсунньутааҕы мунньаҕын иһинэн “Трудовое воспитание – новый взгляд” диэн төгүрүк остуол буолан ааста. Тэрийээччилэр «Юные Якутяне» өрөспүүбүлүкэтээҕи ресурснай киин. СӨ Ил Түмэн Бэрэссэдээтэлэ Антонина Афанасьевна Григорьева тыл эттэ.
Мунньах программата киэҥ, баай ис хоһоонноох ыытылынна. Өрөспүүбүлүкэ оскуолаларыттан Таатта улууһуттан “Станция юных натуралистов” эбии үөрэхтээһин учуутала Виктор Викторович Горохов, С.Р.Кулачиков-Эллэй аатынан Чычымах орто оскуолатын дириэктэрэ Аграфена Порфирьевна Малышева, И.Е.Федосеева – Доосо аатынан Дириҥ агро-оскуолатын дириэктэрэ Михаил Спиридонович Игнатьев, Мииринэй оройуонун Эбии үөрэхтээһин киинин дириэктэрэ Иван Юрьевич Федоров, Мэҥэ Хаҥалас улууһун Аллараа Бэстээх нэһилиэгин 2 №-дээх оскуолатын дириэктэрэ, Ольга Васильевна Колмакова, Дьокуускай куорат 2 №-дээх оскуолатын дириэктэрэ Анна Михайловна Пшенникова уонна Үөһээ Дьааҥы улууһун Боруулаах орто оскуолатын физкультураҕа учуутала Илья Николаевич Попов бэйэлэрин оскуолаларын сүрүн үлэтин, үлэ нөҥүө оҕону иитиигэ уонна угуйууга хайдах үөрэтэллэрин сырдаттылар.
Төгүрүк остуолга мустубут учууталлар, иитээччилэр саҥалыы идеялары, толкуйдары ылыммыттара буолуо диэн эрэнэбит. Үөрэх сокуонугар оҕону үлэҕэ сыһыарыы сорук турбута сөптөөх дьаһал диэн эттилэр.
Нюргуяна Захарова