Тохсунньу 17 күнүгэр Хаҥалас улууһун дьаһалтатыгар суруналыыстары уонна эдэр кэрэспэдьиэннэри наҕараадалыыр улахан тэрээһин буолла. Тэрээһиҥҥэ суруналыыстар, общественнай уонна эдэр кэрэспэдьиэннэр ыҥырыллан сырыттыбыт. Бастатан туран, кинилэри Россияҕа бэчээт күнүнэн эҕэрдэлээбиттэрэ, ааспыт 2023 сыл түмүгүнэн бастыҥ үлэлээхтэргэ наҕараадалары, Махтал суруктары туттарбыттара.
Бу тэрээһиҥҥэ биһиги куруһуокпут салайааччыта Кириллина Сардаана Алексеевна суруналыыс Михаил Демьянович Дьячковскай аатынан бириэмийэ лауреата буолбута. Киниэхэ Диплом уонна харчынан бириэмийэ туттарбыттара. Онтон биһигини, эдкордары, Афанасий Михайлович Яковлев кыыһа Гера Афанасьевна Шишигина эҕэрдэлээбитэ. Биһиги суруналыыстыка академиятыттан түөрт суруналыыс кыттыбыппыт.
Бу тэрээһиҥҥэ Покровскай 1 №-дээх орто оскуолатын «Академия журналистики» (сал. Кириллина С.А.), «Ыллык» литературнай түмсүү (сал. Горохова Л.М.) уонна 2-с Малдьаҕар орто оскуолатын эдкордара (сал. Громова Н.П.) бастыҥ үлэлээхтэринэн ааттаммыттара, суруналыыс Афанасий Михайлович Яковлев аатынан бириэмийэ туппуттара.
Мин бу күн урукку Улахан Ааным оскуолатын оҕолорун – эдкордарын, учууталбын Надежда Петровнаны көрсөммүн, кэпсэтэммин олуһун үөрдүм.
Бу тэрээһин кэннэ мин маннык түмүккэ кэллим. Суруналыыс буолар олус эппиэтинэстээх, суолталаах эбит. Лауреат буолар киһини олус кынаттыыр. Мин 2022 сыл түмүгүнэн лауреат буоламмын, харчылаах бириэмийэ тутаммын, сүргэм көтөҕүллэн, билигин оскуолам, интэринээтим сонуннарын суруйа, айа-тута сылдьабын. Махталбын тириэрдиэм этэ миигин кынаттаабыт учууталларбар Надежда Петрова Громоваҕа уонна Сардаана Алексеевна Кириллинаҕа. Кинилэр миигин угуйан, интэриэспин тардан, үөһэ көтөхпүттэригэр. Бу билигин биһиги академиябытыгар суруналыыстар элбэхпит, онон бары бииргэ буолан өссө даҕаны араас сонуннары сырдатан иһиэхпит диэн эрэнэбин. Дьэ бу курдук Хаҥалас улууһугар олус үчүгэй, суолталаах тэрээһин буолан ааста.
Аман Еремеев,
И.М. Яковлев аатынан Покровскай 1 №-дээх оскуолатын
8 «В» кылааһын үөрэнээччитэ, суруналыыһа.