Ааспыт 2023 сыл биһиги оскуолабыт Х кылааһын үөрэнээччитигэр Йола Бродниковаҕа олус ситиһиилээхтик түмүктэммитэ. Кини Саха өрөспүүбүлүкэтин Бастакы президенэ Михаитл Ефимович Николаев «Билиигинэн кыайыаҥ!» стипендиятын туппута. Биһиги Йоланы кытта көрсөн кэпсэттибит.
Тугу саҥаны интэриэһиргээбиккитин хасыһан билэ-көрөн, арыйан иһэргитигэр баҕарабын. Хоту ыраах улууска олоробут диэн хааччахтаммакка билиигэ-көрүүгэ, сайдыыга куруук аһаҕас буолуҥ. Үөрэҕи-билиини өрө тутан, үүнэ-сайда туруохха!
Кира: Йола, эйиигин бу үрдүк ситиһиигинэн эҕэрдэлиибин! Бу туһунан стипендия туһунан кэпсээ эрэ.
Йола: Махтал! Олус диэн үөрдүм, дьоллоннум. Бу биһиги өрөспүүбүлүкэбитигэр оскуола оҕолоругар саамай үрдүк наҕараада буолар. Михаил Ефимович бэйэтин илиититтэн ылбатаҕым хомолтолоох. Ол эрэн, улуу киһибит стипендиятын тупутум миэхэ улахан ситииһии. Кини үтүө аата ааттана, үгүс үтүө дьыалата үүнэр ыччаты үрдүккэ кынаттыы туруо диэн эрэнэбин.
Сандаара: Йола, эн чинчийэр үлэнэн дьарыктанарын түмүгэр бу ситиһии кэлбитэ буолуо.
Йола: Оннук. Мин научнай конференцияҕа аан бастаан 4-с кылааска үөрэнэ сылдьан кыттыбытым. Уонна улууска бастакы миэстэни ыламмын, салгыы кыттар бигэ санааламмытым. Анаабыр улууһун Сааскылаах орто оскуолатыгар 7 кылааска үөрэнэ сылдьан аҕыйах ахсааннаах хотугу норуоттар тылларын, чуолаан долган уонна эбэҥки норуоттар тылларын, дьүөрэлээн саха, нуучча, английскай тыллары кытта тэҥнээммин, үөрэтэн саҕалаабытым. Ол үлэбин сайыннаран, эбэн, байытан, Саха сирин төрүт олохтоох норуоттарын тылларыгар баар полимдроннары үөрэттим. Үлэбит түмүгүнэн брошюра оҥорбуппут. Онон тылы үөрэтиигэ наука салаатыгар, кыра да буоллар, туһалааҕы оҥорбуппуттан үөрэбин.
Настя: Ханнык улахан конференцияларга кыттыбыккыный?
Йола: Мин үс сыл устата өрөспүүбүлүкэтээҕи “Инникигэ хардыы” научнай-практическай конференцияҕа ситиһиилээхтик кыттыбытым. Барнаул куоракка “Шаг в будущее” Уһук Илин уонна Сибиир уокуруктарын эдэр чинчийээччилэрин күрэҕэр кыайыылаах буолбутум. Казань куоракка Бүтүн Арассыыйатааҕы Лобачевскай аатынан кэмпириэнсийэҕэ призердаабытым. Москваҕа ыытыллыбыт “Национальное достояние России”, “Горизонты открытий” уонна “Высший пилотаж” диэн күрэхтэргэ эмиэ призер аатын ылбытым.
Сандаара: Науканан дьарыктаныан баҕалаах оҕолорго тугу сүбэлиэҥ этэй?
Йола: Тугу саҥаны интэриэһиргээбиккитин хасыһан билэ-көрөн, арыйан иһэргитигэр баҕарабын. Хоту ыраах улууска олоробут диэн хааччахтаммакка билиигэ-көрүүгэ, сайдыыга куруук аһаҕас буолуҥ. Үөрэҕи-билиини өрө тутан, үүнэ-сайда туруохха диэн ыҥырабын.
Түгэнинэн туһанан, Россия араас регионнарыгар, киин куораттарыгар баран кыттарбар күүс-көмө буолар Сааскылааҕым орто оскуолатын коллективыгар, ийэбэр Августина Николаевнаҕа, эбээбэр Юлия Маркелловнаҕа махталбын тиэрдэбин.
Интервьюну ыллылар Сандаара АЛЕКСЕЕВА, Настя СТРОПША,
VII “А” кылаас, Сааскылаах орто оскуолата, Анаабыр