XXVIII төгүлүн ыытыллар академик Владимир Петрович Ларионов аатынан «Инникигэ хардыы» научнай-практическай кэмпириэнсийэҕэ, төрдү ууһу үөрэтэр салааҕа Амма улууһун Покровка сэлиэнньэтин Маай орто оскуолатын 7 кылааһын үөрэнээччитэ Боярская Виолетта уонна Таатта улууһуттан салайааччы быһыытынан кэлбит Картузова Мария Егоровна биир төрдүлээх, аймахтыы буолан тахсыбыттара билиннэ.
Виолетта кэмпириэнсийэҕэ «Памяти предков: генеалогия моей семьи» диэн ааттаах үлэни көмүскээтэ.
— Бу үлэбэр аҕам өттүттэн төрүччүбүн чиничийдим. Мин саамай биллиилэээх төрүтүм Ксенофонтов Петр Петрович — меценат, Амма улууһа чөлүгэр түһэриитин кыттылааҕа буолар. Хос хос хос эбэм Картузова Ксения Петровна бастакы үөрэхтээх саха дьахталларыттан биирдэстэрэ, кини уола Картузов Аркадий Иванович кэргэнэ Картузова Тамара Петровна мин хос хос эбэлэх эһэм буолаллар, Боярская Екатерина Аркадьевна уонна Боярский Александр Степанович — эбэлээх эһэм 5 оҕолоохтор 8 сиэннээхтэр. Билигин иккиэн Аммаҕа Покровкаҕа олороллор, дьиэ хаһаайыстыбатынан дьарыктаналлар, көхтөөх олоҕу тутуһаллар. Инникитин да төрүччүбүн өссө да салгыы үөрэтэ туруом дии саныыбын. Мин бу чинчийиибэр төрүттэрим кимнээхтэрин, олохторун-дьаһахтарын, тугунан дьарыктана сылдьыбыттарын биллим уонна үөрэттим – диэн кэпсиир Виолетта.
Онтон Таатта улууһуттан салайааччы быһыытынан кэлбит Картузова Мария Егоровна бэйэтин санаатын үллэһиннэ:
— Картузовтар диэн араспаанньаны истэммин сэҥээрбитим уонна кэлэн бу кинилэр төрүччүлэрин көрөммүн соһуйбутум аҕай.Эрдэ да истээччим ол эрэн эбии кэпсээтэххэ Картузовтар диэн дьиҥэр Чурапчы улууһун Болтоҥо нэһилиэгиттэн тэнийбит аймах. Ону мин бэйэм үөрэппиппинэн бу Аркадий Картузов аҕатын аҕата Акакий Картузов диэн этэ. Бу киһи буоллаҕына Өксөкүлээх Өлөксөйү кытта Реальнай училищеҕа үөрэммит киһи буолар. Баайдары кытта тапсыбакка Амма улууһугар баран олохсуйар, онно олорон оскуолаҕа дириэктэрдээбит уонна аҕабыыт кыыһын кэргэн ылар. Ол туһунан ахтыылар бааллар. Кырдьаҕастар баар эрдэхтэринэ бу Аркадий Болтоҥоҕо кэлэн аймахтарын көрсө сылдьыбыта. Мин Картузовтар төрүччүлэрин оҥорбут буоламмын бу Виолетта эбэтин Катеринаны кытта эрдэ суруйса сылдьыбытым. Уопсайынан сахалар наһаа элбэҕэ суох буоламмыт син биир ханан эрэ кэлэн ситимнэһэбит. Төрүччүнү оҥоруу уонна билии оҕолорго олус туһалаах дии саныыбын. Салайааччылара дуу эбэтэр төрөппүттэрэ дуу ыйан-кэрдэн биэрдэхтэринэ, оҕо өбүгэлэрэ тугунан ордук биллибиттэрин, дьарыгырбыттарын үөрэтээҕинэ, инникитин төрдүн ууһун дьарыгын салгыы сайыннарыан сөп.