Лицейбит И.Г. Тимофеев аатын сүгэр буолла

Улуу учуонай Альберт Эйнштейн «Выдающиеся личности формируются не посредством красивых речей, а собственным трудом и его результатами» диэн этиитинэн Иван Гаврильевич Тимофеевы ойуулуохха сөп.

Иван Гаврильевич Тимофеев 1932 сыллаахха Мэҥэ Хаҥалас Моорук нэһилиэгэр төрөөбүтэ. Ийэтэ Гаврильева Александра Семеновна холкуоска ыанньыксыттыыра. Аҕата Сосин Гаврил Петрович булчут этэ. 1943 сыллаахха сэриигэ баран, эрдэ тыына быстыбыта. Ол иһин Иван Гаврильевич кыра эрдэҕиттэн ыарахан үлэҕэ сыста улааппыта.

Төрөппүттэрэ оҕолорун билиигэ дьулуурдаах, кыһамньылаахтык үөрэнэргэ, сиэрдээх майгылаах буоларга уһуйаллара. Кинилэр такайыыларынан Иван Гаврильевич бииргэ төрөөбүттэрэ Семен Софронович уонна Анатолий Софронович үрдүк үөрэҕи баһылаабыттара.

Иван Гаврильевич оскуолаҕа үөрэнэр кэмигэр кылааһын ыстаарыстатынан, оскуола үөрэххэ кэмитиэтин бэрэссэдээтэлинэн көдьүүстээхтик үлэлээбитэ, үөрэнээччилэр, учууталлар убаастабылларын, биһирэбиллэрин ылбыта. Иллэҥ кэмигэр саахыматтыыра, хайыһардыыра, чэпчэки атлетиканан дьарыктанара уонна сөбүлээн кинигэ ааҕара. Майа орто оскуолатын ситиһиилээхтик бүтэрээт, Дьокуускайдааҕы педагогическай институкка киирбитэ.

Устудьуоннуур кэмигэр комсомольскай организация көхтөөх чилиэнэ, лектор, пропагандист этэ. 1953-1957 сыллардаахха Төҥүлү орто оскуолатыгар биология уонна география учууталынан үлэлээбитэ. 1972 сылтан саҕалаан, Мэҥэ Хаҥалас райкомун I сэкирэтээрэ. Кини партийнай үлэтин тухары оройуоммут социальнай-экономическай, культурнай сайдыыта ордук тупсубута. Таһымнаах үлэтин иһин үрдүк наҕараадаларынан бэлиэтэммитэ: «Знак почета», «За доблестный труд», о.д.а.

Иван Гаврильевич оҕо сааһа төһө да кыһалҕалаах буоллар, кини санаатын түһэрбэккэ, дьиэ кэргэнигэр күүс-көмө, туһа киһитэ буола улаатан, биһиги улууспут сайдарыгар элбэх сыратын биэрбит үтүө киһи буола үүммүтэ. Хас биирдии оҕо кини курдук күүстээх санаалаах, үлэҕэ дьулуурдаах, сырдыкка-билиигэ тардыһыылаах буолуохтаах.

Быйыл Майа лицейин үбүлүөйдээх 25 сылын көрсө, ытыктабыллаах Иван Гаврильевич Тимофеев аатын иҥэрдилэр. Оскуолабытыгар киниэхэ аналлаах бюст-мемориал арыллыбыта үөрүүлээх түгэн буолла.

Кини аатын үрдүктүк тутуохпут уонна олорбут олоҕун сырдата туруохпут диэн Майа лицейин оҕолорун ааттарыттан этэбин.

Арина Морук, VIII кылаас,

Майа лицейэ, Мэҥэ Хаҥалас.