Алтынньы 20 күнүгэр Мэҥэдьэк нэһилиэгэр «Оҕо сааспыт сайына» сайыҥҥы оҕо лааҕырдарын 20 сыллаах үбүлүөйдээх сүлүөтэ буолан ааста. Бу улахан тэрээһиҥҥэ барыта 4 оскуолаттан 95 оҕо кыттыыны ылла. Хатыы оскуолатыттан икки лааҕыр — туристическай «Хоһуун» уонна от лааҕыра «Лэкээ» кыттыыны ылла. Ыаллыы сытар Маалыкай оскуолатыттан «Эрэл», «Дьоҕур + Эврика», «Маарыкчаан» лааҕыр, Малдьаҕар оскуолатыттан «Сайдыы», ыраах сытар Чуукаар оскуолатыттан «Золотая ракетка» лааҕырдар кэлэн кыттыыны ылан бардылар.
Слет барыта биэс араас түһүмэҕинэн ыытылынна. Ол курдук лааҕыры билиһиннэрии, «Лааҕыр күннэриттэн» миниатюра, лааҕыр хаһыатын уонна гиэрбэтин күрэҕэ, уонна саамай тыҥааһыннаах киирсиинэн өбүгэ оонньуута буолла. Күрэх аата күрэх, ким эрэ кыайар, ким эрэ кыайтарар. Муҥутуур кыайылааҕынан Чуукаартан «Золотая ракетка» хамаандата буолла, бастакы миэстэни Хатыы оскуолатыттан «Лэкээ» ылла, иккис миэстэ — Маалыкайтан «Арчы», үһүс миэстэ — Малдьаҕартан «Сайдыы» лааҕыр.
Биһиги «Чуораанчык» медиа-киин корреспонденнара бу тэрээһинтэн туора турбакка видеоҕа, хаартыска түһэрдибит уонна интервью ыллыбыт.
Феодора Артемовна Семенова, Чуукаар орто оскуолатын дириэктэрин сүбэһитэ, «Золотая ракетка» лааҕыр салайааччыта:
— Биһиги лааҕырбыт «Золотая ракетка» үһүс сылын үлэлиир. Бастакы сезон 2018 сыллаахха арыллыбыта. Лааҕырга мин баһаатайынан үлэлээбитим. Биһиги лааҕырбытыгар оҕолор дьарыктаналлар, сынньаналлар, үнкүүлүүллэр. Хас биирдии оҕо син-биир сайыҥҥы бириэмэтин туһалаахтык атаарыахтаах, туох эрэ дьарыктаах буолуохтаах дии саныыбын. Дьарыга суох киһи сатаан сайдыбат, дьарыктаах киһи элбэҕи ситиһэр, үрдүктэн үрдүккэ тахсан иһэр. Түмүккэ оҕолорго этиэм этэ, элбэх лааҕырга сылдьыҥ, элбэх доҕордонуҥ, үүнүҥ-сайдыҥ.
Василий Алексеевич Васильев, Хатыы орто оскуолатын педагог-организатора, бу тэрээһин сүрүн тэрийээччитэ, «Хоһуун» лааҕыр салайааччыта:
— «Хоһуун» лааҕырга мин оскуолаҕа үөрэнэ сылдьан элбэхтэ сылдьыбыт лааҕырым, ол да иһин буолуо, быйыл үлэһит быһыытынан олус судургутук, үчүгэйдик үлэлээтибит. Манна барыта 10 оҕо 10 хонукка Хатыыттан 10-тан тахса килимиэтир ыраах сытар Ылгыдьаак эбэ хотун туонатыгар сытан, айылҕатын, сирин чинчийэн, сынньанан, сөтүөлээн бэккэ сылдьан кэллибит. Хайа баҕарар оҕо сайыҥҥы өттүгэр лааҕырга сылдьара олус туһалаах дии саныыбын. Манна оҕо доҕордонор, сайдар, үөрэнэр. Сайыҥҥы оҕо лааҕырдара, өссө элбээн, элбэх оҕону иитэн-такайан таһааралларыгар баҕарабын.
Виктория Васильевна Петрова, Маалыкай орто оскуолатын учуутала, «Арчы» лааҕыр 1 сезонун салайааччыта:
— Лааҕырбыт 2000 сылтан үлэтин саҕылаабыта, быйыл 24 сылын үлэлиир. Биһиги быйылгы лааҕырбытыгар 15 иитиллээччи сылдьыбыта. Биэс үлэһит, икки тэпилииссэҕэ үлэлиир туспа үлэһиттэрдээх этибит, лааҕырбыт сүүрбэ биир күн үлэлээбитэ, ас-таҥас кэлэр этэ, онон лааҕырбыт үлэлииригэр чэпчэкитик сатаммыта диэхпин сөп. Мин бастакытын үлэлээтим бу лааҕырга, урут «Мондокуга» үлэлиир этим. Лааҕыр, бастатан туран, оҕолорго бэйэлэрин санааларын сылаамньытар өйдөбүнньүк хаалларар, бэйэ-бэйэлэрин кытта үчүгэйдик, оскуолаҕа олус элбэх буоланнар, бэйэ-бэйэни билсээһин суох, манна чугастык билсэннэр, оҕо тулалыыр эйгэтэ сайдар, иллээх буолаллар, битэмииннээх аһылыгынан аһыыллар, дьарыктаах буолаллар. Оҕо лааҕыра өссө элбии турдун, араас лааҕыр баар буолуон баҕарабын, лааҕырга үлэлиир элбэх дьон баар буоллун, үлэ биир тэтимнээхтик бара турдун диэн баҕа санаалаахпын.
Стас Петров, Маалыкай «Дьоҕур + Эврика» лааҕырын иитиллээччитэ:
— Мин быйыл «Дьоҕур + Эврика» лааҕырга сайыммын атаарбытым. Манна биһиги элбэххэ үөрэннибит, элбэх саҥаны биллибит. Сайыҥҥы лааҕыр оҕоҕо сынньалаҥмытын туһалаахтык атаарарга, оҕону, дьону кытары алтыһа үөрэнэргэ көмөлөһөр. Сайыҥҥы оҕо лааҕырыгар баҕа санаам диэн оҕолору, биһигини, элбэхтик оонньоттуннар.
Эвелина Сафонова, Хатыы оскуолатыттан «Лэкээ» от лааҕырын иитиллээччитэ:
— Мин быйыл «Лэкээ» от лааҕырыгар сырыттым. Манна барыта 10-тан тахса оҕо буолан, олус үчүгэйдик сылдьан, сайыҥҥы күннэрбитин атаарбыппыт. Барыта 8 түгэҕи оттообуппут. Сайыҥҥы лааҕырга оҕолор бары бииргэ сылдьаммыт күммүтүн атаарабыт, умнуллубат күннэр өйдөбүл буолан хаалаллар. Сайыҥҥы лааҕырга мин баҕа санаам диэн өссө элбии туралларыгар. Атын лааҕырдары кытта уопут атастаһан өссө элбэҕи ситиһэллэригэр.
Ити курдук, биһиги нэһилиэкпитигэр бэрт сэргэх тэрээһин буолан ааста.
Санаайа Яковлева, Вова Михеев, Миша Семенов, Хатыы орто оскуолатын 10 кылааһын үөрэнээччилэрэ, «Чуораанчык» медиа-киин эдкордара.