Балаҕан ыйын 29 күнүттэн алтынньы 4 күнүгэр диэри «Орлята России» диэн алын кылаас үөрэнээччилэрин сайыннарыы программатын кыттыылаахтарын уокуруктааҕы сүлүөт буолан ааста. Бу тэрээһиҥҥэ уопсайа 350 киһи муһунна, олор истэригэр 150 алын кылаас учуутала, 50 директоры иитии үлэҕэ сүбэһит уонна 150 үрдүкү кылаас үөрэнээччилэрэ. Биһиги оскуолаттан сэттиэ буолан көхтөөх кыттыыны ыллыбыт.
Бастакы күнтэн олус сэргэх күннэр саҕаламмыттара. Гостиницаҕа киирии кэмигэр оҕолор бэйэ- бэйэлэрин кытта билсиһэн, ыкса доҕордоһон саҕалаабыппыт. Уопсай интэриэспит, үүнэргэ-сайдарга дьулуурбут бииргэ холбообута.
Бастататан туран, тэрийээччилэр үс күн устата биһигини кытта үлэлиир экспертэри кытта билиһиннэрбиттэрэ. Бү киэһээ нетворкин бастакы дьарыгын олус интэриэһинэйдик ыыппыттара. Ол кэннэ тута тректэринэн арахсан, араас технологияларынан оонньоон көрбүппүт.
Тэрээһин үөрүүлээх арыллыытыгар «Aura» сover-группа эдэр ыччат сөбүлүүр ырыаларын бэлэхтээбитэ.
Иккис күммүтүгэр Владивосток куорат устун экскурсияҕа сылдьан, куорат кэрэ-бэлиэ сирдэрин кытта билсибиппит уонна бырайыактыыр сессияҕа кыттан, элбэххэ үөрэммиппит.
Үһүс күммүт квиз-игра диэн өй-билии күрэҕинэн түмүктэммитэ. Бу күрэххэ дириҥ билиилэрин оҕолор хамаандалара кыайаннар, бирииһинэн наҕараадаламмыттара.
Сүлүөт түмүк тэрээһинигэр биһиги оскуола Горнай улууһун делегациятын кытта бииргэ Сахабыт сирин култууратын көрдөрөр нүөмэр бэлэхтээбиппит, дьон-сэргэ биһирэбилин ылбыппыт. Кэлбит ыалдьыттар саха омук төрүт таҥаһын-сабын олус сэргии, хайгыы көрбүттэрэ.
Биһиги Кэбээйи орто оскуолатын оҕолоро Бүтүн Россиятааҕы сүлүөккэ кыттар чиэскэ тиксибиппититэн киэн туттабыт. Саха сириттэн оҕолор бары бииргэ айаннаан, кэпсэтэн, чугастык доҕордоспуппут уонна кэнники бириэмэҕэ сибээспитин быһыа суохпут диэн эрэнэбит.
Бу тэрээһин биһиэхэ элбэх кыах биэрдэ. Маннык хабааннаах тэрээһиҥҥэ тиийэн, бэйэҥ дьиҥ талааҥҥын, майгыгын, тугу сөбүлүү көрөргүн кыбыстыбакка кэпсиэххин сөп эбит диэн биллибит.
Үс күн устата олус элбэххэ үөрэннибит, Орлята России программанан хайдах үлэлииргэ, оонньуу ыытарга үөрэммиппититтэн астынныбыт.
Оҕолорго барыларыгар көхтөөх буолуҥ, онно-манна кыттан иһиҥ диэн сүбэлиибит! Биһиги бу бириэмэ устата элбэҕи биллибит, көрдүбүт, иһиттибит. Учууталларбытыгар, улууспут кураторыгар Маргарита Ионовнаҕа, оскуолабыт директорыгар Анна Егоровнаҕа уонн Сүлүөтү көхтөөхтүк ыыппыт үлэһиттэргэ оҕолор ааттарыттан улахан махтал тиэрдэбит!
Аныгыскы көрсүөххэ диэри!
Сайаана ТЕРЕХОВА, 9 кылаас үөрэнээччитэ,
«Дьоҕур» медиакиин, Кэбээйи орто оскуолата.