Оскуолабытын 1976 сыллаахха бүтэрбит выпускниктары кытта биһиги бастакы кылаастан шефтэһэбит. Соторутааҕыта Аллараа Бэстээххэ баран, «Кыайыы поеһын» көрөн, күүлэйдээн кэлбиттэрэ.
Балаҕан ыйын 30 күнүгэр оскуола боруогун атыллаан үөрэнэ киирбиттэрэ 55 сыла буолбут. Онон үөрэммит оскуолаларыгар кэлэн ыалдьыттаатылар, бэлэхтэри ууннулар: бибилэтиэкэҕэ элбэх араас интэриэһинэй кинигэни, энциклопедияны, хартыынаны, оттон алын кылаас оҕолоругар өйү сайыннарар оонньуулары уонна күөх муннукка сибэккилэри. Бу иллээх выпуск оҕолоро биһиэхэ куруутун өйөбүл, сүбэ-ама буолаллар, элбэххэ үөрэтэллэр. Маннык бэлиэ күҥҥэ биһиги кылааска минньигэс торт уонна 5000 сууммалаах икки стипендия анаатылар. Бу стипендияны сыл түмүгүнэн бастыҥ үөрэнээччигэ уонна бастыҥ спортсменҥа анаатылар. Олус диэн үөрдүбүт уонна соһуйдубут. Бу стипендиялары ким ылан дьоллоноро буолуой?! Наһаа интэриэһинэй, кытаатан кыһаллан үөрэниэхпит. Шефтээх выпускпутугар, аҕам саастаах доҕотторбутугар оскуолабыт коллективын аатыттан уонна чуолаан 6 кылаас оҕолоруттан улахан махталбытын тиэрдэбит!
Айаана Семенова, VI кылаас, Уолба орто оскуолата
Таатта